Ամփոփվել է 2023 թվականի դեկտեմբերին Հայաստանում գրանցված և եկամտային հարկով ապահովված աշխատատեղերի թիվը, ՀՀ-ում ունենք աշխատատեղերի պատմական նոր ռեկորդ։ Այս մասին այսօր Կառավարության նիստի ժամանակ ասաց Նիկոլ Փաշինյանը։
«Ընդ որում՝ որոշ մանրամասներ կան, որոնք կարծում եմ՝ հետաքրքիր են։ 2023 թվականի դեկտեմբերին աշխատատեղերի թիվը կազմել է 741 726, որը 2018 թվականի մայիսի նկատմամբ ավելի է 193 737-ով, այսինքն՝ 2018 թվականի մայիսից ի վեր ՀՀ-ում բացվել է 193 737 աշխատատեղ: Կարևոր է արձանագրել, որ 2023 թվականի դեկտեմբերի ցուցանիշը 2022-ի դեկտեմբերի ցուցանիշից ավելի է 37 306-ով կամ 5.3 տոկոսով»,- ներկայացրեց նա։
Աշխատավարձի ֆոնդի ցուցանիշը, ըստ Փաշինյանի, կազմել է 264 մլրդ 188 մլն դրամ, որը 2018 թվականի նկատմամբ ավելի է 167 մլրդ 501 մլն դոլարով կամ 173 տոկոսով: «Այսինքն՝ համախառն աշխատավարձը 173 տոկոսով 2018 թվականի մայիսից ի վեր ավելացել է, իսկ նախորդ տարվա դեկտեմբերից ի վեր՝ 13,3 տոկոսով կամ 31 մլրդ դրամով: Այսինքն՝ սա էլ շատ կարևոր է՝ արձանագրել գնաճի և աշխատավարձերի աճի հարաբերակցությունը։ 2023 թվականի դեկտեմբերին եկամտային հարկը կազմել է 52 մլրդ 199 մլն դրամ, որը 2018 թվականի մայիսի համեմատ ավելի է 28 մլրդ 35 մլն դրամով. հիշո՞ւմ եք, որ մենք նվազեցրել էինք եկամտային հարկի դրույքաչափը, բայց կրկնակիից ավելի եկամտային հարկ ենք հավաքել։ Իսկ ամենակարևոր ցուցանիշն այն է, որ մեկ մարդու բաժին հասնող միջին ամսական աշխատավարձը, 2023 թվականի դեկտեմբերին կազմել է 356 180 դրամ և 2018 թվականի մայիսի նկատմամբ ավելի է 179 741 դրամով կամ 101.9 տոկոսով: Այսինքն՝ 2018 թվականի մայիսից ի վեր միջին ամսական աշխատավարձը դրամային ցուցանիշով կրկնապատկվել է: Սա կարևոր արձանագրում է: Նախորդ տարվա նկատմամբ աճը՝ 25 273 դրամ, և 7,6 տոկոս»։
Փաշինյանը աշխատատեղերի հետ կապված ևս մեկ վիճակագրություն ներկայացրեց․ 2018 թվականի դեկտեմբերին մինչև 150 հազար դրամ վարձատրությամբ աշխատողների թվաքանակն ընդհանուրի մեջ կազմում էր 60,4 տոկոս, այսինքն՝ սա աշխատավարձային ամենացածր սեգմենտն է, որը 2018 թվականի սեպտեմբերին եղել է 60,4 տոկոս, իսկ 2023 թվականի դեկտեմբերին կազմել է 43,3 տոկոս, այսինքն ավելի քան 17 տոկոսով ցածր աշխատավարձային սեգմենտը նվազել է: Փաշինյանի ներկայացմամբ՝ 150-500 հազար դրամ աշխատավարձ ստացողները 2018 թվականի դեկտեմբերին եղել են 31,2 տոկոս, 2023 թվականի դեկտեմբերին՝ արդեն 40,6 տոկոս, այսինքն՝ շուրջ 9 տոկոսով այստեղ աճ կա։
«500 հազար և ավելի աշխատավարձ ստացողների թիվը 2018 թվականին կազմում էր ընդհանուրի մեջ 8,4 տոկոս, 2023 թվականի դեկտեմբերին կազմել է 16,1 տոկոս, այսինքն՝ կրկնապատկվել է, և բացարձակ թվերով ուզում եմ մեր բոլորի ուշադրությունը հրավիրել հետևյալի վրա: Սա թիվ է, որը մենք փնտրում էինք․ 2018 թվականին 500 հազար և ավելի աշխատավարձ Հայաստանում ստացել է 49 239 մարդ, 2023 թվականին՝ 119 483 մարդ, մեր 500 հազար դրամ և ավելի աշխատավարձ ստացողների թիվը կրկնապատիկի չափով մեծացել է, որը շատ էական ցուցանիշ է: Եթե ճիշտ եմ հիշում, ուզում եմ տեղեկացնել նաև, որ մեր բյուջետային վերջին քննարկումների ժամանակ մենք արձանագրեցինք նաև, որ մեզ մոտ իրական աշխատավարձի էական աճ նույնպես տեղի է ունեցել, և եթե հիշողությունս չի դավաճանում, 2022 թվականի արդյունքներով իրական աշխատավարձը ՀՀ-ում աճել էր 33 տոկոսով, ինչը կարևոր ցուցանիշ է։ Սրանք շատ կարևոր ցուցանիշներ են»,- ամփոփեց նա։
Փաշինյանի խոսքով՝ պետք է ամեն ինչ անել, որ 2024 թվականի ցուցանիշները էականորեն ավելի լավը լինեն։ Մանրամասները՝ տեսանյութում