Ի լրումն հունիսի 24-ին հրապարակված տեղեկատվության՝ ՀՀ-ում ՌԴ դեսպանությունը հայտնում է, որ Ռուսաստանի Դաշնության Կառավարությունը հաստատել է օտարերկրյա քաղաքացիների կողմից Ռուսաստանի Դաշնություն մուտք գործելու դիմումի լրացման կամավոր բնույթը՝ գործածելով ruID հավելվածը:

Լրացված դիմումի բացակայությունը չի ազդի սահմանային հսկողության իրականացման վրա և չի հանդիսանա մուտքի մերժման հիմք: «Միևնույն ժամանակ, խնդրում ենք նկատի ունենալ, որ ruID հավելվածի միջոցով մուտքի դիմումը լրացնելու դեպքում օտարերկրյա քաղաքացիներին հասանելի կլինեն մի շարք առավելություններ, որոնք ուղղված կլինեն Ռուսաստանի Դաշնությունում նրանց հարմարավետ կացության ապահովմանը.

• Ռուսաստանի ՆԳՆ-ի կողմից Ռուսաստանի Դաշնություն մուտքի սահմանափակումների առկայությունը նախապես ստուգելու հնարավորություն.

• Ռուսաստանում գտնվելու պարզեցումը՝ դիմումի մեջ պարունակվող տեղեկատվության հիման վրա օտարերկրյա քաղաքացու թվային պրոֆիլի ստեղծման շնորհիվ.

• պետական ծառայություններ ստանալիս վարչական և այլ խոչընդոտների նվազեցում (կամավոր բժշկական ապահովագրության պոլիս ձեռք բերելու դեպքում, որպես ինքնազբաղված գրանցվելու և այլն).

• կապի պայմանագիր կնքելու համար անհրաժեշտ СНИЛС-ի ավտոմատ գրանցում (ռուսական SIM քարտի ձեռքբերման դեպքում).

• պետական մարմինների և կազմակերպությունների հետ ապագայում լիարժեք էլեկտրոնային եղանակով փոխգործակցության հնարավորության ապահովում»,- ասված է հաղորդագրությունում:

Ավելին՝ այստեղ:

Ամիսներ առաջ տեղեկացրել էինք, որ ՌԴ մեկնող օտարերկրացին պարտավոր կլինի 72 ժամ առաջ տեղեկացնել իր մուտքի մասին և ստանալ հաստատման կոդ: ՌԴ մուտքի այս փոփոխությունը սպասվում է հունիսի 30-ին։