ԱՄՆ նորընտիր նախագահ Դոնալդ Թրամփը Կանադան անվանել է «նահանգ», իսկ Կանադայի վարչապետին՝ «նահանգապետ» («կառավարիչ»)

«Հաճելի էր երեկ երեկոյան ընթրել Մեծ Նահանգ Կանադայի կառավարիչ Ջասթին Տրյուդոյի հետ: Ես անհամբեր սպասում եմ նահանգապետի հետ հանդիպմանը նորից, որպեսզի մենք կարողանանք շարունակել մաքսատուրքերի և առևտրի վերաբերյալ մեր խորը բանակցությունները, որոնց արդյունքներն իսկապես կլինեն տպավորիչ բոլորի համար»,- գրել է ԱՄՆ նորընտիր նախագահը Truth Social սոցիալական ցանցում։

Անգլերենում «state» բառը կարող է օգտագործվել և՛ «նահանգ», և՛ «պետություն» իմաստներով։ Սակայն Թրամփը Տրյուդոյին անվանել է «կառավարիչ», «նահանգապետ»՝ դրանով իսկ հասկացնելով, թե ինչ նկատի ունի։

Բացի այդ, NBC News հեռուստաընկերությանը տված հարցազրույցում Թրամփն ասել է, որ Կանադան ու Մեքսիկան կարող էին դառնալ ԱՄՆ նոր նահանգներ։

«Մենք սուբսիդավորում ենք Կանադային տարեկան ավելի քան 100 մլրդ դոլարով։ Մենք սուբսիդավորում ենք Մեքսիկային մոտ 300 մլրդ դոլարով։ Ինչո՞ւ ենք մենք սուբսիդավորում այդ երկրներին։ Եթե մենք մտադիր ենք սուբսիդավորել նրանց, թող դառնան [նոր] նահանգներ»,- ասել է ԱՄՆ նորընտիր նախագահը։