ՀՀ նախագահ Վահագն Խաչատուրյանը մինչև օրս աշխատակազմի ղեկավար չունի։ Բացի աշխատակազմի ղեկավարի պաշտոնից, թափուր են նաև կառուցվածքային մի շարք այլ ստորաբաժանումների ղեկավարների պաշտոններ։
MediaHub.am-ի գրավոր հարցմանն ի պատասխան՝ Հանրապետության նախագահի աշխատակազմի հասարակայնության հետ կապերի վարչությունից պատասխանել են, որ ՀՀ նախագահի աշխատակազմի ղեկավարի պարտականությունների իրականացումը վերապահված է աշխատակազմի ղեկավարի տեղակալին՝ համաձայն ՀՀ Հանրային ծառայության մասին օրենքի և ՀՀ նախագահի աշխատակազմի կանոնադրության:
«ՀՀ նախագահի աշխատակազմում թափուր պաշտոնների առաջացումն ու համալրումը բնականոն և շարունակական գործընթաց է, որը վերաբերելի է բոլոր պետական կառույցներին: Աշխատակազմի հանրային ծառայության պաշտոնների համալրման նպատակով հայտարարված մրցույթների մասին տեղեկությունները հրապարակվում են ՀՀ նախագահի պաշտոնական կայքի հայտարարություններ բաժնում:
ՀՀ նախագահի աշխատակազմի նպատակը ՀՀ նախագահի լիազորությունների իրականացման ապահովումն է: Աշխատակազմում հաստիքների քանակը որոշվում է բազմաշերտ վերլուծությունների հիման վրա, «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքով սահմանված կարգով»,- ասվում է պատասխանում։