Այսօր՝ հունիս 17-ին, ՊԾ Երևան քաղաքի գնդի 2-րդ գումարտակում օպերատիվ տեղեկություններ են ստացվել, որ «BMW» մակնիշի ավտոմեքենայի վարորդը իր մոտ պահվող պայուսակում (բարսետկա) ապօրինի զենք է պահում:

Ինչպես հայտնում է ֆոտոլրագրող Գագիկ Շամշյանը, գնդի հրամանատար Անդրանիկ Իսախանյանի, գումարրտակի հրամանատար Արսեն Ստեփանյանի և գումարտակի հրամանատարի տեղակալ Դավիթ Նիկողոսյանի, ինչպես նաև նույն գումարտակի 3-րդ վաշտի հրամանատար Արման Մարտիրոսյանի գլխավորությամբ կազմվում են պարեկների խմբեր, քանի որ պետք է ճշտվեր, թե որ ուղղությամբ է նշված ավտոմեքենան երթևեկում:

Կարճ ժամանակ անց 2-րդ գումարտակում հերթական օպերատիվ տեղեկությունն է ստացվում, որ «BMW» մակնիշի կասկածելի ավտոմեքենան գտնվում է Սեբաստիա փողոցում:

Պարեկներ Արման Սահինյանն ու Էդգար Դարբինյանը նկատում են նշված ավտոմեքենան ու «կանգառ» հրահանգ են տալիս:

Վարորդը կանգնում է, իջնում է ավտոմեքենայից՝ ուսին գցած բարսետկայով:

Երբ պարեկները նրանց հարցնում են, թե ինչ կա պայուսակում, վարորդը դիմում է փախուստի ու սկսվում է պարեկների կողմից նրա հետապնդումը:

Մոտ 800 մետր պարեկները հետապնդում են նրան, ով չի կարողանում ճողոպրել պարեկներից, ապա նրան բերման են ենթարկում ոստիկանության Մալաթիայի բաժին:

Տեղում պարզվում է, որ ստացված օպերատիվ տեղեկությունները հավաստի էին. բարսետկայում հայտնաբերվում է թմբուկավոր մարտական ատրճանակ, իսկ վարորդը՝ Երևանի բնակիչ 21-ամյա Վ. Ս.-ն պարեկներին, ապա ոստիկաններին հայտնում է, որ այդ պայուսակը ինքը գտել է այն ժամանակ, երբ գնացել է ընկերոջ տատիկի գերեզման, ու այնտեղ, երբ տեսել է պայուսակը, վերցրել է, ապա բացել, ու մեջը հայտնաբերել է զենքը և այն, ըստ իր հայտարարության, պետք է բերեր, հանձներ իրավապահներին, բայց չի հասցրել՝ «Պարեկները որտեղից իմացան, որ վրես զենք կա, բռնեցին»:

Ավտոմեքենան տեղափոխվել է ոստիկանության Մալաթիայի բաժնի պահպանվող հատուկ տարածք: