Փորձագետ, Հայ-ռուսական համալսարանի դասախոս Կարեն Իգիթյանի մուտքը ՀՀ արգելվել է: Այս մասին հայտնում է ԱԺ «Պատիվ ունեմ» խմբակցության պատգամավոր Տիգրան Աբրահամյանը։
«Թեև Իգիթյանը ՌԴ քաղաքացի է, սակայն 2009 թվականից մշտական բնակություն էր հաստատել իր հայրենիքում` Հայաստանում:
Սահմանապահները նրա մուտքն արգելելու հետ կապված որևէ հիմնավորում չեն ներկայացրել, սակայն վստահ եմ, որ դրա հիմքում քաղաքական դրդապատճառներն են` հաշվի առնելով Կարենի հրապարակային դիրքորոշումներն ու իշխանության նկատմամբ ունեցած վերաբերմունքը:
Դեռ չեմ խոսում այն մասին, որ մինչև այս պահն իշխանությունը նման ձևով է վարվել աշխարհի տարբեր հատվածներում ապրող հայերի նկատմամբ և արգելել այն մարդկանց մուտքը Հայաստան, որոնց տեսակետները տարբերվում են իշխանության դիրքորոշումներից»,- գրել է նա:
Կարեն Իգիթյանը գրել է.
«Ես վերադառնում էի Երևան Պյատիգորսկից, որտեղ մասնակցել էի «Կովկասյան երկխոսությանը» և խոսել եմ Թուրքիայի կողմից Կովկասում տարածվող արմատականության մասին։
Հանրապետություն ժամանելուն պես Ազգային անվտանգության ծառայության սահմանապահ զորքերը հայտարարեցին, որ ինձ արգելվում է մուտք գործել երկիր։ ԱԱԾ-ի և օդանավակայանի անվտանգության ծառայության աշխատակիցների համար հարցեր չկային. նրանք իրենց պահեցին հնարավորինս կոռեկտ և պրոֆեսիոնալ։
Այնուամենայնիվ, կան հարցեր (հռետորական) Հայաստանի իշխող ուժերի համար։
Ո՞րն է արգելքի պատճառը։ Որովհետև ես լրատվամիջոցներում պաշտպանեցի Հայ Առաքելական Եկեղեցին։ Կամ որովհետև խոսեցի Թուրքիայի կողմից տարածվող արմատականության մասին։
Ես վերջին 16 տարիների ընթացքում ապրել և աշխատել եմ Հայաստանում»։