Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ, երեկ առավոտյան ժամը 10:30-ի հատվածում փակել են Ստեփանակերտ-Գորիս մայրուղին:
Ադրբեջանական լրատվամիջոցները հաղորդում են, որ ակցիան անցկացնում են բնապահպանական ոչ կառավարական կազմակերպությունները՝ դժգոհելով, որ նախօրեին իրենց Դրմբոնի և Կաշենի հանքավայրերում դիտարկում անցկացնելու հնարավորություն չի տրվել։ Նրանք հանդիպում են պահանջում ռուս խաղաղապահների հրամանատար Անդրեյ Վոլկովի հետ։
Ակցիայի մասնակիցները տարածքում՝ հենց Գորիս-Ստեփանակերտ ճանապարհին, վրաններ են տեղադրել։
Երեկ երկու առանձին հեռախոսազրույցներ են տեղի ունեցել Վլադիմիր Պուտին- Նիկոլ Փաշինյան, Վլադիմիր Պուտին- Իլհամ Ալիև ձևաչափերով, սակայն ողջ օրվա ընթացքում և այսօր՝ մինչև այս պահը, ճգնաժամը հաղթահարված չէ. Լաչինի միջանցքը շարունակում է փակ մնալ:
Հայկական մեդիա հարթակում երեկ ուշ երեկոյան տեղեկատվություն տարածվեց, թե իբրև ռուս խաղաղապահները մինչև վաղը կեսօր ժամանակ են տվել Լաչինի միջանցքն ապօրինի փակած ադրբեջանցիներին՝ ինքնուրույն ապաշրջափակելու ճանապարհը: Նշվում է, որ հակառակ դեպքում խաղաղապահները կբացեն ճանապարհը եւ ուժի կիրառմամբ կվերականգնեն երթեւեկությունը։
Այս մասին խաղաղապահներն անուղղակի տեղեկացրել են Ստեփանակերտի Վերածննդի հրապարակում երեկ ուշ երեկոյան հավաքված քաղաքացիներին, որ վերջիններս զերծ մնան միջանցքի ապաշրջափակման գործողություններից։
Ինչևէ, առայժմ փորձենք հասկանալ, թե ինչ նպատակներ է հետապնդում ադրբեջանական սադրանքը:
Կարծում ենք՝ ուկրաինական պատերազմով պայմանավորված աշխարհաքաղաքական նոր իրավիճակում Բաքուն փորձում է ճշտել, թե որոնք են ռուսական խաղաղապահ առաքելության նոր «կարմիր գծերը», այլ խոսքով՝ ինչքանով են սահմանափակված Մոսկվայի կարողությունները: Մյուս կողմից, Ադրբեջանի նպատակն է՝ ԼՂ-ում ՌԴ խաղաղապահ զորախմբի ապահովման կոմունիկացիները դիվերսիֆիկացնել, այսինքն, հասնել նրան, որ խաղաղապահ զորախումբը կապվի ադրբեջանական տրանսպորտային ենթակառուցվածքների հետ։
Բաքվի մյուս նպատակն արցախցիներին ցույց տալն է, որ ԼՂ ճակատագիրն ամբողջովին գտնվում է Բաքվի ձեռքերում:
Իհարկե, չի բացառվում, որ Լաչինի միջանցքն ընդամենը պատրվակ է, որի միջոցով Բաքուն փորձում է ճնշում գործադրել Հայաստանի վրա՝ մեր երկրի տարածքով համարժեք ռեժիմով ճանապարհ ստանալու նպատակով:
Եվ վերջապես, իրավիճակը «տաք» պահելով՝ Ալիևը լուծում է նաև ներքաղաքական օրակարգ: Ադրբեջանական մամուլը լեցուն է նյութերով, որոնք այլ բան չեն, քան Ալիևի անզուսպ փիառ:
Վահրամ Բագրատյան