Այսօր՝ հուլիսի 16-ին, նշվում է օձերի համաշխարհային օրը։ Այս առիթով MediaHub-ը հետաքրքրվեց, թե այս տարի քանի մարդ է տուժել օձերի խայթոցի հետևանքով։
MediaHub-ի հետ զրույցում ՆԳՆ-ի խոսնակ Նարեկ Սարգսյանը ներկայացրեց 2024 թվականի առաջին կիսամյակում իրավիճակը:
Ըստ այդմ, 2024 թվականի ապրիլ ամսում օձի խայթոցի մեկ դեպք է գրանցվել նախորդ տարվա համեմատ։
Մայիս ամսին արձանագրվել է օձի խայթոցի 15 դեպք, իսկ հունիս ամսին՝ 11 դեպք։
Անդրադառնանք Հայաստանի մարզերին, որտեղ ավելի շատ են արձանագրվել օձի խայթոցի դեպքերը։
Ըստ այդմ Արագածոտնի մարզում այս տարի չի գրանցվել այդպիսի դեպք, այնինչ Արարատի մարզում գրանցվել է երեք դեպք։ Արմավիրի մարզում՝ հինգ, իսկ Գեղարքունիքի, Լոռիի, Կոտայքի, Շիրակի մարզերում այս տարի օձի խայթոցի դեպք չի արձանագրվել։
Հայաստանի լեռնային գոտիներում ՝ Սյունիքում արձանագրվել է երեք դեպք, Վայոց Ձորում՝ մեկ, իսկ Տավուշում՝ երկու դեպք։
Օձի խայթոցի ամենաշատ դեպքերն արձանագրվել են Երևան քաղաքում՝ 13 դեպք։
«Խոսրովի անտառ» պետական արգելոցի տուրիզմի մասնագետ Լուսինե Մարգարյանը MediaHub-ի հետ զրույցում ասաց, թե ինչ է պետք անել օձ տեսնելու դեպքում։ «Նախ տեսնելու դեպքում պետք չէ խուճապի մատնվել ու զանգահարել համապատասխան մարմիները»,- նշեց նա։
Խոսելով օձերի օրվա մասին՝ մեր զրուցակիցը նշեց, որ հատուկ միջոցառում չի նախատեսվում։
Առողջապահության նախարարության մամուլի խոսնակ Մարիամ Ծատրյանը MediaHub-ին հայտնեց, որ օձերի խայթոցներից տուժել է ընդհանուր 119 մարդ, որից 98-ը մեծահասակներ են։
Վիկա Աբգարյան