Չեչնիայի Հանրապետության ղեկավար Ռամզան Կադիրովը ուղերձ է տեսագրել, որում խոստովանել է, որ ուզում է անժամկետ արձակուրդ գնալ։ Քաղաքական գործչի խոսքով՝ ինքն արդեն չափից դուրս երկար է մնացել Չեչնիայի ղեկավարի պաշտոնում, գրում է «Комсомольская правда»-ն։

«Այսօր իմացա, որ ես, պարզվում է, երկարակյաց եմ Ռուսաստանի Դաշնության սուբյեկտների գործող ղեկավարների շրջանում։ Ես ինքս նկատեցի, որ շատ երկար մնացի։ Կարծում եմ, որ լիովին արժանի եմ անժամկետ եւ երկարատեւ արձակուրդի։ Հուսով եմ, որ դուք ինձ կաջակցեք ու կհասկանաք»,- ասել է Կադիրովը, որի ուղերձը հրապարակվել է Telegram-ում։

Ինչպես հիշեցրել է քաղաքական գործիչը, ինքը Չեչնիայի Հանրապետությունը ղեկավարում է արդեն 15 տարի։ Այս կապակցությամբ Չեչնիայի ղեկավարը հիշել է մի չեչենական ասացվածք, որն ասում է, թե «որքան էլ հարգված լինի հյուրը, եթե նա ժամանակին է գնում, դա ավելի հաճելի է»։ Կադիրովի խոսքով՝ «իր ժամանակը եկել է»։

«Մենք արդեն այդ մասին սկսել ենք մտածել եւ կփորձենք ժամանակին հեռանալ»,- հավելել է նա։

Ռամզան Կադիրովը Չեչնիայի ղեկավարն է 2007 թվականից։ Մինչեւ 2011 թվականը նա եղել է հանրապետության նախագահը, սակայն այդ պաշտոնը վերացվել է։