Կադաստրի կոմիտեի նախագահ Սուրեն Թովմասյանը Mediahub-ի հետ զրույցում ասաց, որ այսօր սահմանազատման և սահմանագծման հարցերով աշխատանքային խմբի կազմում ադրբեջանական կողմի հետ հանդիպմանը մասնակցում է նաև իր տեղակալ Արամ Գուգարացը, բայց տեղյակ չէ՝ ինչ օրակարգով է անցկացվում հանդիպումը։ Անդրադառնալով անկլավների, ինչպես նաև դրանց հավանական հանձնման հետևանքով Հայաստանի սահմանների ու քարտեզի փոփոխության հարցին՝ Սուրեն Թովմասյանը դժվարացավ հստակ բան ասել․ «Ցանկացած իրավական ուժով փաստաթղթի ներկայացում՝ Կադաստրի կոմիտե, էդ փասաթուղթը չի կարող անտեսվել մեր կողմից»։
Դիտարկմանը, թե Նիկոլ Փաշինյանը չի հերքում, որ կա անկլավների խնդիր ինչպես մեր կողմից, այնպես էլ Ադրբեջանի կողմից, Թովմասյանն ասաց, թե պետք է կոնկրետ համայնքներ ու սահմաններ նշենք ու դիմում գրենք, իրենք մանրամասն մեզ կպատասխանեն, թե կադաստրային քարտեզների մեջ որ տարածքներն են ներառված, որոնք՝ ոչ։ Ասացինք՝ Տավուշի մարզի Սուֆուլու, Բարխուդարլու գյուղերը, օրինակ, անկլա՞վ են, թե՞ ոչ, և ինքը, առհասարակ, Հայաստանում ադրբեջանական անկլավ ճանաչո՞ւմ է, թե՞ ոչ։
«Նախևառաջ պետք է հասկանանք՝ էդ անկլավներ ասելով Դուք ի՞նչ նկատի ունեք, որ ես կարողանամ Ձեր հարցին պատասխանեմ»,- ասաց նա։
Իսկ Նիկոլ Փաշինյանն ի՞նչ նկատի ուներ՝ անկլավների մասին խոսելով, Թովմասյանն ասաց․
«Պարոն վարչապետը միշտ խոսել է անկլավներից էն իմաստով, որ մենք ունենք Ադրբեջանի տարածքում անկլավ, և էդ անկլավի հարցի վերաբերյալ մենք ունենք բոլոր իրավահաստատող փաստաթղթերը, իսկ էն նշումները Ադրբեջանի կողմից, որ իրենք էլ մեր տարածքում ունեն անկլավներ, մենք ասել ենք, որ էդ հարցերը իրավահաստատող փաստաթղթերի պարագայում ենթակա են քննարկման»։
Հարցրինք՝ իրենք ունե՞ն անկլավ մեր տարածքում, Կադաստրի կոմիտեի նախագահը զարմացավ հարցից․ «Բա ես ի՞նչ իմանամ, հիմա ես կարա՞մ ասեմ՝ քո գրպանում ինչ կա»։
Նա նաև չկարողացավ հստակ ասել՝ երեք տարի առաջ թշնամուն հանձնված Գորիս-Կապան մայրուղին և դրան հարակից բնակավայրերն ու տները Հայաստանի պետական սահմանի ու քարտեզների մե՞ջ էին մտնում, թե՞ ոչ։
Մանրամասն՝ տեսանյութում
Վահե Մակարյան