Հայաստանի սահմանամերձ բնակավայրերում օրը սկսում են պաշտպանության նախարարության պաշտոնական հաղորդագրություններն ընթերցելուց հետո միայն։

«Ուզում ենք իմանալ՝ ուրիշ ո՞ր գյուղերի ուղղությամբ են կրակ բացել, և ի՞նչ քայլեր է ձեռնարկում մեր ռազմական գերատեսչությունը»,- MediaHub-ի հետ զրույցում ասաց Արցախից տեղահանված ու Սյունիքի մարզում ապաստանած Մարինե Մարտիրոսյանը` նշելով, որ հայկական կողմը միայն արձանագրում է կատարվածը: «Այդպես վերջին շրջանում նաև Արցախում էր»։ 

Որ թշնամու աչքը Սյունիքի վրա է, սյունեցիները վաղուց գիտեն, հարցն այն է, թե իրենց տներում լիարժեք ապրելու իրավունքն ինչո՞ւ խախտվեց, և ո՞ւր է տանում այս անորոշությունը։ 

«Ասում եք «խաղաղության դարաշրջան», «խաղաղության խաչմերուկ»։ Չեմ կարծում, թե Փաշինյանը չգիտի, որ թույլի ու զիջողի համար երբեք էլ խաղաղություն չի լինի»,- ասաց Վերիշենի բնակիչը։ 

Երեկ երեկոյան թշնամու նշանառության տակ հայտնվեցին Սյունիքի մարզի Արավուս և Խոզնավար գյուղերի հատվածում տեղակայված հայկական դիրքերը։ Այս մասին այսօր հայտնեց ՀՀ ՊՆ-ն:

Արավուսի բնակիչ Արգամ Հովսեփյանը MediaHub-ին ասաց, որ հրադադարի խախտումներն ինտենսիվ են դարձել հատկապես վերջին 3 օրերին։ 

«Բնակելի տների ու դիրքերի միջև հեռավորությունը սկսվում է նույնիսկ 100 մետրից, իսկ կրակոցները, որոնք արձակում է Ադրբեջանը, լսելի են համայնքում։ Դրանք, սակայն, խուճապ չեն առաջացնում»,- ասաց նա՝ նշելով, որ պետությունն անվտանգության պահպանման առումով անելիքներ շատ ունի։

«Ինչպես Արցախը պաշտպանեցին, էդպես էլ Սյունիքն են պաշտպանում»,- դառնությամբ ընդգծեց նա։ 

Արցախի անկումից հետո առաջնագիծ դարձած Սյունիքի որոշ բնակավայրերում թեպետ խուճապ չկա, բայց մարդիկ անհանգստանում են, մանավանդ, որ գարնանային եղանակների հետ բացվում է նաև գյուղատնտեսական աշխատանքների սեզոնը։ 

«Դաշտերում սկսվել է վար ու ցանքը, իհարկե՛, անհանգստանում ենք։ Արդեն 3-4 օր գիշերային ժամերին կրակում են։ Ճիշտն ասած, տների վրա չեն կրակել, բայց դե, մեկ է, անհանգստություն կա»,- ասաց Խոզնավարի բնակիչ Էմիլ Մկրտչյանը։

Հունան Թադևոսյան