Հեռահաղորդակցման սարքավորումներ արտադրող ֆիննական Nokia ընկերությունը ներկայացրել է զարգացման նորացված ռազմավարությունը և նոր լոգոտիպը։
«Ընկերության նոր պատկերանշանը խորհրդանշում է կենսունակ, դինամիկ և ժամանակակից Nokia-ն՝ ցուցադրելով նրա արժեքներն ու նպատակները։ Այն նախագծվել է որպես համագործակցության խորհրդանիշ»,- ասվում է ընկերության մամլո հաղորդագրության մեջ: Reuters-ը նշում է, որ սա ընկերության առաջին վերանախագծումն է մոտ 60 տարվա ընթացքում։
Ընկերության գլխավոր տնօրեն Պեկկա Լունդմարկը հայտարարել է, որ այդպիսով ցանկանում են վերագործարկել բրենդը եւ այլևս չասոցացվել հնացած բջջային հեռախոսների հետ:
Հին լոգոյում պարզապես գրված էր Nokia բառը, սակայն այժմ լոգոն բաղկացած է հինգ տարբեր ձևերից, որոնք կազմում են ընկերության անվանումը։ N տառը ունի կտրված աջ ուղղահայաց գիծ, K տառը ունի կտրված ձախ ուղղահայաց գիծ, իսկ A տառի մեջ կա «բացատ»: Բացի այդ, ըստ Reuters-ի, հին տարբերանշանի խորհրդանշական կապույտ գույնը փոխարինվել է: տարբեր գունային տիրույթով:
Ընկերության տնօրենը հայտարարել է նաև, որ մտադիր են նոր թափ հաղորդել ընկերության գործունեությանը:
«Մարդկանց մեծամասնության կարծիքով մենք դեռևս բջջային հեռախոսների հաջող բրենդ ենք, բայց Nokia-ն դա չէ: Մենք ցանկանում ենք թողարկել նոր ապրանքանիշ, որը մեծապես կենտրոնացած կլինի ցանցերի և արդյունաբերական թվայնացման վրա»,- ասել է Nokia-ի գլխավոր տնօրեն Պեկկա Լունդմարքը (մեջբերում է Bloomberg-ը): Նա հավելել է, որ ընկերությունը ռեբրենդինգ է կատարում՝ «արտացոլելու, թե ով ենք մենք այսօր՝ որպես B2B տեխնոլոգիական նորարարության առաջատար»:
