221-օրյա շրջափակման մեջ գտնվող Արցախում իրավիճակը գնալով օրհասական է դառնում: 

Ստեփանակերտ քաղաքի դեղատներում գրեթե սպառվել է մանկական կերը, տակդիրները, դեղորայքի հիմնական մասը:

Խանութները հիմնականում դատարկ են, ցուցափեղկերում միայն թանկարժեք խմիչքներ են:
Այս վերջին օրերին շատ խանութներ անգամ հաց չեն կարողանում ստանալ վառելիք չլինելու պատճառով, որի հետևանքով հիմնականում դադարեցնում են իրենց աշխատանքը ու փակվում:
Վառելիքի սղության պատճառով Արցախի տրանսպորտի ոլորտը կաթվածահար է: Հասարակական տրանսպորտը հիմնականում չի գործում:

Գյուղապրանքներից և շրջկենտրոններից դեպի մայրաքաղաք գործող եզակի տրանսպորտային միջոցների թիվը այնքան է նվազել, որ հավասարազոր է չգործելուն: Այդ եզակի տրանսպորտով երթևեկելու համար պետք է ունենալ ամուր ֆիզիկական և հոգեկան վիճակ, որ կարողանաս դիմանալ:

Շատ գյուղերից արդեն էլ ոչ մի տրանսպորտ չի գործում, և այս ամենի հետևանքով գյուղացին իր մշակած բանջարեղենը և միրգը չի կարողանում տեղափոխել Ստեփանակերտ:
Գյուղացին այս ընթացքում աշխատել է, որ կարողանա իր արտադրանքը սպառելուց ստացված գումարով հնարավորության դեպքում, գոնե, գնել այն ապրանքատեսակները, որի կարիքն ունի: Ստեփանակերտի բնակիչն էլ տուժում է նրանից, որ մթերքի քանակը պակասում է:
Այս պահին մարդկանց հիմնականում անհրաժեշտ են՝ ձեթ, աղ, շաքարավազ, ալյուր և, իհարկե, հիգիենայի պարագաներ:

Հիմնականում մարդկանց մոտ ավարտվել է լվացքի փոշին, կանայք ստիպված, ով դեռ ունի, հագուստը լվանում են ամանի հեղուկով:

Խանութներ հաց չտեղափոխելու հետևանքով ահռելի հերթեր են առաջանում հացի փռերի դիմաց: Առավոտյան մարդիկ հինգին, վեցին են գնում հերթեր կանգնում, արևի տակ երկար ժամերով կանգնում են, որ կարողանան գոնե օրվա հացը տուն տանել, բայց երբեմն հերթը հասնում է, և լույսերի հերթական անջատման պատճառով մնում ես առանց հացի: Ստիպված պետք է ևս երկու ժամ կանգնես, որ կարողանաս հաց գնել:

Արդեն որերորդ անգամն է, որ հայտնում են տարեց մարդու, երեխայի ուշագնացության դեպքերի մասին հենց  այդ հերթերի ժամանակ:

Բացի այն, որ նորմալ սնունդ չեն կարողանում ստանալ, ջուր էլ չկա, որ գոնե կարողանան գնել:
Ստեփանակերտում հասարակական տրանսպորտ չի գործում, բացառությամբ Աջափնյակ և Նոր Արեշ թաղամասերը սպասարկող երթուղիների, այն էլ շաբաթական երկու օր ու շատ սահմանափակ:

Քանի որ այդ երկու հասարակական տրանսպորտը բավականին մարդաշատ են լինում, և գրեթե շնչելու օդը բացակայում է, արդեն երկու դեպք է գրանցվել, որ հղի կանայք են վատացել:  
Ի դեպ՝ այս ամենից ելնելով՝ վերջին մեկ ամսվա ընթացքում թերսնուցման և հոգեկան ծանր ապրումների պատճառով Արցախում երեք անգամ աճել է  հղիության վաղ շրջանում պտղի կորուստների ցուցանիշը:

Մանկապարտեզներում սննդի պակաս կա, որի հետևանքով որոշները  չեն գործելու:
Մարդիկ անորոշությունից հոգեբանորեն ճնշված վիճակում են:
Բայց, չնայած այս բոլոր դժվարություններին, արցախցին պատրաստ է պայքարել իր հայրենիքում ապրելու և արարելու համար...
Աննա Մանգասարյան, հատուկ MediaHub-ի համար:

MediaHub-ը փորձում է Արցախի ձայնը լսելի դարձնել աշխարհին, ցույց տալ մարդկային ճակատագրերն այս աղետալի օրերին: Աշխարհը լուռ է, բայց լուռ հետևել, թե ինչ է կատարվում հայկական երկրորդ պետությունում մենք չենք կարող....