Լաչինի միջանցքում ռուս խաղաղապահների փաստացի անգործությանն անդրադառնալով՝ իտալական La Repubblica թերթին տված հարցազրույցում վարչապետ Նիկոլ Փաշինյանը պատմական զուգահեռ էր անցկացրել ու հայտարարել, թե կարող է «մի օր ուղղակի արթնանանք և տեսնենք, որ Ռուսաստանը տարածաշրջանում չէ»:

Ռուսաստանի կողմից տարածաշրջանը լքելու վերաբերյալ Փաշինյանի քննադատությանը հաջորդեց Մոսկվայի ոչ պաշտոնական արձագանքը։ Մասնավորապես, ռուսական պետական ՏԱՍՍ գործակալությանը դիվանագիտական աղբյուրը հայտնել է, թե Ռուսաստանը, որպես Հայաստանի ամենամոտ բարեկամ և հարևան, չի պատրաստվում լքել Հարավային Կովկասը, բայց Երևանը չպետք է Արևմուտքի գործիքը դառնա Ռուսաստանի Դաշնությանը դուրս մղելու համար:

Հայ- ռուսական հարաբերություններում ինստիտուցիոնալ ճգնաժամ է, որը մեծապես խորանում է Նիկոլ Փաշինյանի անզգույշ հայտարարությունների, ոչ դիվանագիտական պահվածքի հետևանքով:

Հարկատուները Փաշինյանին վճարում են ոչ թե մակերեսային փորձագիտական վերլուծություններ անելու, «օդում կախված» լուրերի ոճով եզրահանգումների գալու, այլ մեր պետության օրակարգը սահմանելու, արդյունավետ քափղաքականություն իրականացնելու համար:

Ցավոք, Փաշինյանն անցած հինգ տարիներին այդպես էլ չդարձավ ողջամիտ պետական այր՝ մնալով բուլվարային թերթի խմբագրի կարգավիճակում: Փաշինյանն ունի իր «աշխարհը», ինչի շրջանակում վարված քաղաքականությունը նոր դաշնակիցներ չբերեց մեր երկրին՝ պատ կառուցելով արդեն առկա դաշնակցային հարաբերություններում:

Վահրամ Բագրատյան