Ես կարծում եմ, Հանրապետական կուսակցության ներկայացուցիչ մեր գործընկերները հետևողականության հետ խնդիր ունեն։ Այս մասին ԱԺ հայտարարությունների ժամին արտահերթ ելույթի ժամանակ հայտարարեց ԱԺ փոխնախագահ Ռուբեն Ռուբինյանը:

«Նոր ելույթ ունեցան գործընկերները, որոնք անդրադարձան վարչապետի տված հարցազրույցին: Վարչապետը մի պարզ միտք է արտահայտում, որ ՀՀ գոյությունը երաշխավորելու համար կարևոր կոմպոնենտ է, որ մենք կենտրոնանանք ՀՀ միջազգայնորեն ճանաչված սուվերեն տարածքի վրա և մեր լեգիտիմության սահմանների վրա կանգնենք և չունենանք պահանջներ հարևաններից: Նրանք հարցազրույցը մեկնաբանում են՝ հրաժարում հայկականությունից, հայկական արժեքներից, պատմությունից և աշխարհում գոյություն ունեցող ցանկացած սրբությունից։ Հիշեցնենք մի այլ հարցազրույց, որը 2013թ․ մարտի 18-ին տվել է այն ժամանակ նախագահ Սերժ Սարգսյանը, որում նա ասել է ՝ «իշխանության մեջ գտնվողը չի կարող ասել, որ մենք պետք է ճանաչենք ԼՂ անկախությունը, ես 10 րոպե հետո նրան աշխատանքից կազատեմ։ Իշխանության գտնվողը չի կարող տարածքային պահանջներ ներկայացնել որևէ հարևան երկրին, 10 րոպե հետո ես նրան աշխատանքից կազատեմ»։ Խնդրում եմ բացատրեք, եթե մենք ունեինք երկու պետություն, ինչո՞ւ էր ՀՀ նախագահի աթոռ զբաղեցնող Սերժ Սարգսյանը ասում, որ ինքը ցանկացած իշխանության ներկայացուցչի, որը կհանդգնի ասել, որ պետք է ճանաչել ԼՂ անկախությունը, կազատի աշխատանքից, այն էլ տասը րոպե հետո»,- ասաց Ռուբինյանը՝ դիմելով, մասնավորապես, ՀՀԿ-ական Հայկ Մամիջանյանին և Աննա Մկրտչյանին:

Մանրամասները՝ տեսանյութում