Եվրամիության արտգործնախարարները երեկ Լյուքսեմբուրգում կայացած նիստում հաստատել են Հայաստան դիտորդական առաքելություն ուղարկելու որոշումը, որի շուրջ համաձայնությունը ձեռք էր բերվել այս ամսվա սկզբին Պրահայում՝ Հայաստանի, Ադրբեջանի, Ֆրանսիայի և Եվրոպական խորհրդի ղեկավարների հանդիպման ժամանակ։
Եվրամիությունը լիովին հանձնառու է նպաստել Հարավային Կովկասում կայուն խաղաղությանը, նիստից հետո Թվիթերում գրել է ԵՄ արտգործնախարար Ժոզեպ Բորելը, հավելելով.
«Մենք 40 հոգուց բաղկացած դիտորդական կարողություն ենք տեղակայում հայ - ադրբեջանական սահմանի երկայնքով՝ ամրապնդելու վստահությունը մի անկայուն իրավիճակում, երբ մարդկային կյանքերը վտանգի տակ են»:
Նախնական համաձայնությամբ, առաքելությունը պետք է սկսի աշխատանքը հոկտեմբերին և գործի առավելագույնը երկու ամիս։
ԵՄ առաքելության դերակատարությունն, անշուշտ, դրական է, սակայն նրա շուրջ Հայաստանում ստեղծվել է անիրական սպասումների նշաձող, ինչին անխուսափելի հաջորդում է հիասթափությունը:
ԵՄ քաղաքացիական առաքելությունը բաղկացած է ընդամենը 40 մարդուց ու, ըստ էության, կարճաժամկետ է, ըստ այդմ՝ դժվար է նրա հետ հույսեր կապել ինստիտուցիոնալ խաղաղության հաստատման առումով:
Այս առաքելության մանդատը շատ թույլ է ու այն փաստացի մերժվել է Ադրբեջանի կողմից, որը եվրոպացի դիտորդների հետ համագործակցելու է սեփական հայեցողությամբ՝ նրանց չթողնելով անգամ սեփական տարածք:
Եվ վերջապես՝ քաղաքացիական առաքելությունը եվրոպական առաքելություն է, որը մեծ դժկամությամբ է ընդունվել Մոսկվայում ու Թեհրանում: Այս մայրաքաղաքներում, մեղմ ասած, շահագրգռված չեն այս առաքելության հաջողությամբ:
Իհարկե, Հայաստանն առավելագույնը պետք է փորձի օգտվել այս առաքելության դրական հետևանքներից, բայց պետք է խոստովանել, որ այն Պրահայի համաձայնությունների միակ կիրառական ձեռքբերումն էր, որն ավելի շատ ուղղված է միջնորդների դեմքը փրկելուն:
Վահրամ Բագրատյան