Goldman Sachs-ը նվազեցրել է ԱՄՆ-ի համար 2023 թվականի համախառն ներքին արդյունքի կանխատեսումը, քանի որ տեսնում է մինչեւ այս տարվա վերջը Դաշնային պահուստային համակարգի ավելի ագրեսիվ քաղաքականությունը եւ կարծում է, որ դա կհանգեցնի գործազրկության մակարդակի բարձրացման՝ ավելի, քան նախկինում կանխատեսվել էր, հայտնում է Reuters-ը:

Ուրբաթ երեկոյան հրապարակված գրառման մեջ Goldman-ը տեղեկացրել է, որ այժմ կանխատեսում է ՀՆԱ-ի 1,1 տոկոս աճ հաջորդ տարի՝ 2022 թվականի չորրորդ եռամսյակից մինչեւ 2023 թվականի վերջը 1,5 տոկոս աճի նախորդ կանխատեսման համեմատ:

Ազդեցիկ ֆինանսական ընկերությունն այժմ ակնկալում է, որ Դաշնային պահուստային համակարգը հաջորդ շաբաթ իր նիստի ժամանակ կբարձրացնի տոկոսադրույքները 75 բազիսային կետով՝ ավելի վաղ 50 բազիսային կետի համեմատ, եւ ենթադրում է 50 բազային կետով տոկոսադրույքների բարձրացումներ նոյեմբերին եւ դեկտեմբերին, իսկ մինչեւ տարեվերջ դաշնային ֆոնդերի տոկոսադրույքը կհասնի 4-4,25 տոկոսի:

«Տոկոսադրույքների այսպիսի բարձրացումը, զուգորդված ֆինանսական պայմանների վերջին խստացման հետ, ենթադրում է հաջորդ տարի աճի եւ աշխատատեղերի մի փոքր ավելի վատ հեռանկարներ»,- նշում է Goldman Sachs-ը:

Նրա կարծիքով, գործազրկության մակարդակը տարեվերջին կկազմի 3,7 տոկոս՝ 3,6 տոկոսի համեմատ, իսկ 2023 թվականի վերջին այն կաճի մինչեւ 4,1 տոկոս՝ նախկին 3,8 տոկոսի համեմատ։