ԱՄՆ նախագահ Դոնալդ Թրամփը իր նախորդ Ջո Բայդենի օրոք որոշ փաստաթղթեր ստորագրելու համար ավտոմատ ստորագրությունն անվանել է Միացյալ Նահանգներում տեղի ունեցած ամենամեծ քաղաքական սկանդալը 2020 թվականի ընտրությունների արդյունքներից հետո, երբ Թրամփը պարտվել էր Բայդենին։
Ավելի վաղ՝ հունիսի 1-ին, ԱՄՆ Կոնգրեսի վերահսկողության հանձնաժողովի ղեկավար Ջեյմս Կոմերը հայտարարել էր, որ Ներկայացուցիչների պալատը նույնականացրել է չորս անձի, ովքեր ավտոմատ ստորագրություն են օգտագործել նախկին նախագահ Ջո Բայդենի անունից փաստաթղթեր ստորագրելու համար նրա պաշտոնավարման տարիներին, չնայած նրանց անունները չեն նշվել։
Մայիսին Թրամփը հայտարարել էր, որ Բայդենը իր պաշտոնավարման ընթացքում ինքնուրույն ոչինչ չի ստորագրել։ ԱՄՆ նախագահը նշել էր, որ Բայդենի օրոք երկիրը ղեկավարել են «արմատական ձախ խելագարները», որոնք հասանելիություն են ունեցել պետության ղեկավարի «ավտոմատ ստորագրությանը»։
«Բացառությամբ 2020 թվականի կեղծված նախագահական ընտրությունների, ավտոմատ ստորագրությունը ԱՄՆ պատմության մեջ ամենամեծ քաղաքական սկանդալն է», - գրել է Թրամփը «Truth Social» սոցիալական ցանցում։