Պաշտոնական հանդիպում տեղի չի ունեցել, խոսակցություն եղել է ճաշի սեղանի շուրջ. Այս մասին MediaHub-ի հետ զրույցում ասաց ՀՀ Կառավարության տեղեկատվության և հասարակայնության հետ կապերի վարչության պետ Արմեն Խաչատրյանը՝ մեկնաբանելով ՌԴ նախագահ Վլադիմիր Պուտինի հայտարարությունն այն մասին, որ նախօրեին, փաստորեն, տեղի է ունեցել Պուտին-Փաշինյան-Ալիև հանդիպում:
Թե ինչ է քննարկվել, այդ մասին Արմեն Խաչատրյանը ոչինչ չասաց, բայց ընդգծեց, որ պաշտոնական հանդիպում, որպես այդպիսին, տեղի չի ունեցել։
“Վլադիմիր Պուտինի հայտարարությունը ընդամենը ճաշի սեղանի շուրջ տեղի ունեցած խոսակցության մասին է”,- շեշտեց նա։
MediaHub-ն ավելի վաղ գրել էր, որ Նիկոլ Փաշինյանի հետ հանդիպման մեկնարկին Վլադիմիր Պուտինը հայտարարել է.
"Տնտեսական համագործակցությունը զարգանում է դրական, բայց կարևոր հարցն այսօր Ղարաբաղում իրավիճակի կարգավորումն է: Նախօրեին մենք սկսեցինք (քննարկել– խմբ.), նաև հաջողվեց երեքով զրուցել: Իհարկե, կարևոր խնդիրը Հարավային Կովկասում իրավիճակի կարգավորումն է և հայ-ադրբեջանական հարաբերությունները, և ամենը, ինչ կապված է Ղարաբաղի հետ":