Լրատվական կայքերում և համացանցում տեղեկություն էր տարածվել, ըստ որի՝ ոստիկանության Չարենցավանի բաժնում երեք ոստիկան ծեծի են ենթարկել մի քաղաքացու՝ պահանջելով, որ նա ընդունի չկատարած հանցագործությունը:
Միաժամանակ, հիվանդանոց տեղափոխելուց առաջ ոստիկանության ծառայողները հորդորել են, որ վնասվածքների վերաբերյալ հայտնի, որ դրանք ստացել է ընկնելու հետեւանքով:
ՆԳ նախարարի հանձնարարությամբ անմիջապես ՆԳՆ ներքին անվտանգության եւ հակակոռուպցիոն վարչությունում նշանակվել է ծառայողական քննություն, ինչի շրջանակում օպերատիվորեն պարզվել են որոշ հանգամանքներ։ Պարզվել է, որ դեկտեմբերի 5-ին «Միքայելյան» բժշկական կենտրոնից ոստիկանության Չարենցավանի բաժին հաղորդում է ստացվել, որ մարմնական վնասվածքներով բուժօգնության դիմած վերոհիշյալ տղամարդը հայտնել է, որ վնասվածքը ստացել է Չարենցավան քաղաքի զբոսայգում ընկնելու հետեւանքով։
Տղամարդն իր բացատրության մեջ հաստատել է ոստիկանների կողմից բռնության ենթարկվելը:
Միաժամանակ, ոստիկանության Չարենցավանի բաժնի ծառայողներն իրենց բացատրություններով հերքել են նրա նկատմամբ բռնություն գործադրելու հանգամանքը։
ՆԳՆ ներքին անվտանգության եւ հակակոռուպցիոն վարչությունում իրականացված ծառայողական քննությամբ ձեռք բերված փաստաթղթերն ուղարկվել են Գլխավոր դատախազություն:
MediaHub-ը հիշեցնում է, որ դեկտեմբերի 7-ին արցախցի փաստաբան Ռոման Երիցյանը ֆեյսբուքյան իր էջում ահազանգել էր, որ ոստիկանության Չարենցավանի բաժնում երեք ոստիկան դաժանաբար ծեծի են ենթարկել Արցախից բռնի տեղահանված, պատերազմի մասնակից Արա Օհանյանին: Ծեծի հետևանքով, ըստ Ռոման Երիցյանի, Օհանյանը արդեն չորրորդ օրն է բուժում է ստանում «Միքայելյան» հիվանդանոցում: Երիցյանն իր հրապարակած տեսանյութում նաև անուններ է տալիս, թե ովքեր են ենթադրյալ ծեծի ենթարկողները եղել Սամվել անունով մի ոստիկան, որի ազգանունը չէր հիշում, բաժնի պետի տեղակալ Իսկանդարյան: Ծեծի նպատակը, ըստ հաղորդման, եղել է այն, որ Արա Օհանյանն իր վրա վերցնի իր աշխատավայրում տեղի ունեցած գողությունը: