Երիկամների հիվանդությունները կարող են երկար ժամանակ առանց ախտանիշների լինել, սակայն մեջքի ստորին հատվածի ցավն ու արյան բարձր ճնշումը երիկամների հետ կապված խնդիրների հնարավոր նշաններ են: Այս մասին NEWS.RU-ի հետ զրույցում ասել է թերապեւտ Զարեմա Տենը։
«Երիկամների շատ հիվանդություններ վաղ փուլերում կարող են լինել առանց ախտանիշների: Այնուամենայնիվ, արժե ուշադրություն դարձնել այնպիսի նշանների վրա, ինչպիսիք են այտուցը (հատկապես դեմքի և ոտքերի), մեզի գույնի և քանակի փոփոխությունը, մեջքի ցավը, արյան բարձր ճնշումը, ընդհանուր թուլությունն ու հոգնածությունը»,- ընդգծեց Տենը։
Վաղ հայտնաբերման դեպքում երիկամների հիվանդությունը կարող է բուժվել կամ վերահսկվել: Սա թույլ է տալիս մարդկանց նորմալ կյանք վարել և խուսափել բարդություններից: Ուստի, եթե ունեք շաքարային դիաբետ, հիպերտոնիա և այլ քրոնիկական հիվանդություններ, կարևոր է պարբերաբար հետազոտվել բժշկի մոտ, որպեսզի բաց չթողնեք երիկամների հիվանդության վաղ փուլերը։