Նիկոլ Փաշինյանը միայնակ չի կարող բռնապետություն հաստատել, եթե նրան չաջակցեն տարբեր պաշտոնյաներ, պատգամավորներ, իշխանության հաստիքային ու արտահաստիքային հաճախորդներ։

«Բռնապետության դեմքը» խորագրի այսօրվա «հերոսները»՝ ԱԺ ՔՊ խմբակցության պատգամավորներ Հովիկ Աղազարյանը և Հակոբ Ասլանյանն են, որոնց առաջարկած օրենսդրական փոփոխությունները կարող են նոր հարված հասցնել ընտրական ինստիտուտին:

Ի՞նչ են առաջարկում պատգամավորները

Ազգային ժողովի «Քաղաքացիական պայմանագիր» խմբակցության պատգամավորներ Հովիկ Աղազարյանը և Հակոբ Ասլանյանը ներկայացրել են օրենքի նախագիծ: Մասնավորապես, նրանք առաջարկում են փոփոխություն կատարել Ընտրական օրենսգրքում և ամրագրել, որ քվեախցիկը պետք է տեղադրվի այնպես, որ ընտրողը քվեարկության պահին լինի թիկունքով դեպի հանձնաժողովը:

Հիմնավորման մեջ պատգամավորները նշում են, թե ներկայումս գործող կարգավորմամբ, երբ քվեարկողը դեմքով է դեպի հանձնաժողովը, խոչընդոտվում է գաղտնիությունը, և ամենասովորական հեռախոսով հնարավորություն կա քվեաթերթիկը լուսանկարելու:
ՔՊ-ական պատգամավորները կարծում են, որ եթե քվեախցիկների դիրքը փոխեն, և հնարավոր լինի ընտրողների հետևը կանգնել, վերահսկել նրա քայլերը, առավելագույնս կապահովվի քվեարկության գաղտնիությունը, թափանցիկությունը և, որ ամենակարեւորն է, ընտրողի ազատ կամարտահայտությունը, քանի որ անհնար կլինի լուսանկարել քվեաթերթիկը: Իրականում իշխող կուսակցության անդամները ընտրակեղծիքի, ընտրողի քվեարկությունը վերահսկելու նոր մեխանիզմ են գործի դնում, քանի որ նախագծում հստակ չեն գրել, թե, օրինակ, հանձնաժողովի անդամը կամ վստահված անձը որքա՞ն հեռավորություն պետք է պահպանի ընտրողից:

Վերահսկելի հանձնաժողով, նոր խաղի կանոններ

Երբ Նիկոլ Փաշինյանը ԿԸՀ նախագահի պաշտոնում «տեղավորեց» իր յուրային Վահագն Հովակիմյանին, արդեն պարզ էր, որ Հայաստանում ավարտվում է օրինական ընտրությունների պայմանական փուլը, և իշխանությունները կազմակերպչական ու օրենսդրական հիմքեր են ստեղծելու՝ «հարմար» ընտրություններ անցկացնելու համար: Հենց այդ տրամաբանության մեջ պետք է դիտարկել Աղազարյանի ու Ասլանյանի նախաձեռնությունը, մանավանդ, որ պատգամավորական այս զույգը, որպես կանոն, հայտնի է նրանով, որ սատարում է Փաշինյանի ոչ պոպուլյար բոլոր նախաձեռնությունները:

Վահրամ Բագրատյան