Աջապահյանը մի բան է մոռանում, որ նախկին իշխանություններն ընտրված չեն եղել, հետևաբար չէին կարող Աստծուց լինել։ Այս մասին այսօր ԱԺ ամբիոնից իր ելույթի ժամանակ ասաց ՔՊ-ական, շիրակցի պատգամավոր Էմմա Պալյանը՝ անդրադառնալով Շիրակի թեմի առաջնորդ Միքայել արքեպիսկոպոս Աջապահյանի այն հայտարարություններին, որոնցով նա քննադատում է Նիկոլ Փաշինյանին։
Պալյանը հիշեցրեց Փաշինյանի հետևյալ հայտարարությունը՝ եթե Կառավարության և եկեղեցու հարաբերությունները լավ չեն, ապա լավ չեն եկեղեցու հարաբերությունները Աստծո հետ։
«Որոշ եկեղեցականներ, քաղաքական գործիչներ, գրպանային լրատվամիջոցներ փորձեցին սկանդալ ստանալ։ Ինձ չի վախեցնի և լռեցնի իմ այս կարծիքից հետո հնչող կարծիքները։ Շիրակի թեմի առաջնորդ Միքայել արքեպիսկոպոս Աջապահյանը, որը մեկ անգամ չէ, որ աչքի է ընկել իր ընդդիմադիր հայացքներով, քաղաքական կեցվածքով, ով առիթը բաց չի թողնում քաղաքական խոսույթով քննադատել ընտրված իշխանություններին, ով այս ամբիոնից հայտարարեց, թե Լաչինի միջանցքը փակել է հայ զինվորը՝ մի քանի օր է նորից քաղաքական խոսույթով քննադատում է վարչապետի հայտարարությունը՝ հնչեցնելով վիրավորական արտահայտություններ երկրի ընտրված ղեկավարի հասցեին, նշելով, որ այս իշխանությունները պատիժ են և երկիրը գցել են անդունդի մեջ։ Ավելացնում է նաև, որ նախկին իշխանությունները Աստծուց էին և եկեղեցին հաշտ էր նրանց հետ։ Պարոն Աջապահյան, ձեր տեղը եկեղեցում է, ձեր խոսքը հասկանալի և ընդունելի կլինի այն ժամանակ, երբ բացարձակ քաղաքական լինելուց զատ կլինի նաև հոգևոր։ Իսկ մինչ այդ, հաճախ եկեղեցում մոմ վառեք և Աստծուց ներողություն խնդրեք»,-ասաց նա։
Մանրամասները՝ տեսանյութում: