ԱԽ քարտուղարի շուրթերով, ըստ էության, ասվեց՝ ՀՀ-ում իշխանությունը զավթած խմբակին Արցախի պաշտպանությունը չի հետաքրքրում։ Այս մասին MediaHub.am-ի հետ զրույցում ասաց ռազմական փորձագետ Կարեն Վրթանեսյանը՝ անդրադառնալով ԱԽ քարտուղար Արմեն Գրիգորյանի այն հայտարարությանը, որ ՀՀ-ից այլևս զորակոչիկներ չեն լինելու Արցախի Պաշտպանության բանակում։
«ՀՀ-ից զորակոչիկներ չտանելու փաստը վաղուց հայտնի է` դեռ նոյեմբերի 9-ի հայտարարությունից հետո։ ԱԽ քարտուղարը պարզապես արդեն պաշտոնապես հայտարարեց այդ մասին»,- ասաց Վրթանեսյանը՝ մտահոգություն հայտնելով Գրիգորյանի հարցազրույցի ժամանակ հնչեցրած մեկ այլ ասածի վերաբերյալ․

«Ինձ համար էլ ավելի մտահոգիչ է, իր երկրորդ հայտարարությունը, որ ՀՀ-ից պայմանագրային զինծառայողներ չեն ներգրավվելու Պաշտպանության բանակում։ Սա շատ ավելի մտահոգիչ հայտարարություն է, ինչը նշանակում է, որ ՀՀ-ում գրանցված ցանկացած զինծառայողից Նիկոլ Փաշինյանի թիմը ձեռք է քաշում։ Ըստ էության՝ սա պաշտոնական հայտարարություն է, որ արցախցիներին ասում են՝ դուք ինքներդ ձեր գլխի ճարն ինչպես կարող եք տեսեք»,- ասաց Վրթանեսյանը` հավելելով, որ սա Արցախը Ադրբեջանին հանձնելու գործողությունների քայլերից մեկի անոնսն է։

«Ավելին ասեմ, սա շատ լուրջ վտանգ է այն մարդկանց համար, որոնք այսօր Արցախում համազգեստ են կրում, զբաղվում են Արցախի պաշտպանությամբ, քանի որ եթե ինչ-որ մեկը գերի ընկնի, ադրբեջանցիները հայտարարելու են, որ դա ինչ-որ անօրինական զինված ահաբեկչական խմբակ է, ինչպես օրինակ, տեղի ունեցավ Խծաբերդի պաշտպանների հետ»,- նշեց ռազմական փորձագետը։
Հարցին՝ հնարավո՞ր է արդյոք միայն ՊԲ-ի ուժերով պաշտպանել Արցախի Հանրապետության սահմանները, Կարեն Վրթանեսյանը պատասխանեց․

«Կարծում եմ՝ հնարավոր չէ, չի հաջողվի միայն ՊԲ ուժերով և ռուս խաղաղաղապահների սահմանափակ կոնտինգենտով, որն այնտեղ կա, պաշտպանել Արցախը։ Հիշենք, որ Արցախը նախկինում մոտ 20 հազարանոց ուժերով էր համալրված, իսկ այսօր, երբ կրճատվում է և՛ ՀՀ ժամկետայինների զորակոչը, և՛ ՀՀ-ից պայմանագրայինների համալրումը, ակնհայտ է, որ չենք ունենալու այն պաշտպանական բանակը, որն ունեցել ենք»,- ընդգծեց Վրթանեսյանը։

Դիտարկմանը արդյոք հնարավորություն կա՞ր հետպատերազմյան շրջանում խուսափել Արցախից ՀՀ ԶՈՒ դուրսբերումից՝ օրինակ դիվանագիտական ճանապարհով, ռազմական փորձագետը վստահություն հայտնեց՝ նշելով․

«Ավելի քան վստահ եմ, իհարկե, հայտարարության մեջ բավականին լղոզված են դրա առնչությամբ ձևակերպումները․ եռակողմ հայտարարության մեջ ակնհայտորեն նշվում է՝ հայկական ուժերի դուրսբերում, ստացվում է՝ այնտեղ պաշտպանության բանակ էլ չպետք է լինի։ Երկրորդ՝ դա այն ձևաչափով էր ասված, որ այնտեղ մտցվում եմ ռուս խաղաղապահներ, դրան զուգահեռ դուրս են բերվում հայկական ուժերը, այստեղ մեկ այլ մեկնաբանությունն այն է, որ խոսքը ինչ-որ հատվածներից հայկական ուժերի դուրսբերման մասին է, ոչ ամբողջությամբ՝ հակառակ դեպքում, եթե այդպես չլիներ, նույն Ադրբեջանն ինչի՞ համար էր այսքան ժամանակ լռում։ Ակնհայտ է, որ եղել են նաև բանավոր պայմանավորվածություններ, իսկ դա, ըստ էության, ակնհայտ անօրինական բան է, դավադրություն է ՀՀ-ի դեմ, որին փաստացի մասնակցել է Նիկոլ Փաշինյանը և իր թիմը»։

Հարցին՝ արդյոք հավանակա՞ն է Արցախի մնացյալ հատվածից ՊԲ ամբողջական դուրսբերումը, Վրթանեսյանը պատասխանեց․
«Դա կնշանակի ընդհանրապես հայաթափում, Նիկոլ Փաշինյանի վարած քաղաքականությունը տանում է դրան։ Ըստ էության՝ Արմեն Գրիգորյանի շուրթերով ասվեց, որ ՀՀ-ում իշխանությունը զավթած խմբակին Արցախի պաշտպանությունը չի հետաքրքրում, արցախցիներն իրենք պետք է, ինչպես կարող են, իրենց գլխի ճարը տեսնեն»։

Մերի Գևորգյան