Այսօր՝ փետրվարի 1-ին, արտակարգ դեպք է տեղի ունեցել Երևանում։ Ժամը 18։30-ի սահմաններում ՀՀ ՆԳՆ Փրկարար ծառայության 911 ճգնաժամային կառավարման կենտրոն ահազանգ է ստացվել, որ Սարի Թաղի 27-րդ փողոցի թիվ 2 տան դիմաց Renault մակնիշի ավտոմեքենան հետընթաց կատարելիս բախվել է կայանված Infiniti մակնիշի ավտոմեքենային, այնուհետև գազատար խողովակին, ապա GAZ 3110 մակնիշի ավտոմեքենային։

Ինչպես դեպքի վայրից հայտնում է ֆոտոլրագրող Գագիկ Շամշյանը, ըստ նախնական տեղեկությունների, վթարի հետևանքով, բարեբախտաբար, տուժածներ չկան։

Օպերատիվորեն ժամանել են ՀՀ ՆԳՆ Փրկարար ծառայության Երևանի թիվ 3 հրշեջ փրկարարական ջոկատից 1 մարտական հաշվարկ։  

Հրշեջ փրկարարները հոսանքազրկել են ավտոմեքենաները, փակել գազաբալոնն ու սահմանազատել տարածքը։ 


Օպերատիվորեն ժամանել են նաև «Գազպրոմ Արմենիա» Երևանի ԳԳՄ-ի աշխատակիցները՝ «Գազպրոմ Արմենիա» ՓԲԸ-ի «Տրանսգազ» ՍՊԸ-ի տնօրեն Գառնիկ Մովսիսյանի, «Գազպրոմ Արմենիա»-ի Երևանի ԳԳՄ տնօրեն Վազգեն Արտաշեսյանի գլխավորությամբ։

Սարի Թաղի բազմաթիվ տներ վթարի պատճառով այս պահին գազազրկված են, ու արդեն «Գազպրոմ»-ի Երևանի ԳԳՄ-ի Էրեբունու մասնագետներն արդեն աշխատանքներ են կատարում վթարը վերականգնելու ողղությամբ։