Վլադիմիր Պուտինի ելույթը Վալդայի ֆորումում և ՀԱՊԿ արտահերթ գագաթնաժողովի ժամանակ խառնեցին խաղաքարտերը՝ Հայաստանի վարչապետին այլ բան չէր մնում, քան պաշտպանել Պուտինի ասածը։ Այս մասին Տելեգրամի իր ալիքում գրել է ՌԴ Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը:
Նրա խոսքով, սակայն, Նիկոլ Փաշինյանը Նիկոլ Փաշինյան չէր լինի, եթե Ռուսաստանի վրա չթողներ ընտրությունը Ղարաբաղի ամբողջական հանձնմանը համաձայնվելու և հակամարտության գոտում հայ բնակչության կյանքի ու իրավունքների երաշխավորման պայքարի միջև։
«Ես ամենևին չեմ բացառում, որ ՌԴ նախագահի հետ երկկողմ հանդիպման ժամանակ Նիկոլ Փաշինյանը փորձի արդարացնել Հայաստանի իշխանությունների վերջին գործողությունները՝ ցույց տալով, թե վիրավորված է ռուսական հասարակական տիրույթում և ՌԴ հայ համայնքում իր վարած կուրսին տրվող անկախ գնահատականներից։ Ակնկալիքն էլ այն է, որ Ռուսաստանի նախագահը ժամանակ չի ունենա վերլուծելու, թե ով է մեղավոր, ով՝ ոչ: Ինչպես Պուշկինի «Նավապետի դուստր»-ում է ասվում՝ «... և պատժիր երկուսին էլ»։
Բայց, ինձ թվում է, Ուկրաինայում իրադարձությունների սկզբից, իսկ իրականում շատ ավելի վաղ, Ռուսաստանում սովորեցին տեսնել խոսքի և գործի միջև տարբերությունը։ Եվ ոչ միայն Հայաստանում»,- գրել է Զատուլինը։
Ռուսաստանցի պատգամավորը, ում մուտքը Հայաստան արգելվել է, նաև ներկայացրել է տվյալներ այն մասին, որ անցած մեկ ամսվա ընթացքում Հ1-ի եթերում, Պետրոս Ղազարյանի հյուր են եղել հակառուսական ուղղվածության 14 փորձագետներ, որոնցից 10-ն ուղղակիորեն ներկայացնում են իշխանությունը: Եվ ընդամենը մեկ պատգամավոր ընդդիմությունից: Նրանց մեծամասնությունը, գրել է Զատուլինը, հղում անելով այս ուսումնասիրության հեղինակ Տիգրան Քոչարյանին, Ռուսաստանի հասցեին մեղադրանքներ են ներկայացրել,, պահանջել դուրս գալ ՀԱՊԿ-ից, զրկել ռուսական հեռուստաալիքները եթերից ՀՀ-ում, անգամ Պուտինին անվանել «նոր Թալեաթ», իսկ ՀՀ իշխանություններն այս ամենին ուղղակի նայում են մատների արանքից:
Հիշեցնենք, վաղը Նիկոլ Փաշինյանը կմեկնի Սոչի, որտեղ նախատեսված է եռակողմ հանդիպումը Պուտին-Փաշինյան-Ալիև ձևաչափով, ինչպես նաև երկկողմ հանդիպում Պուտինի հետ: