Մոլդովայի նախկին վարչապետ Վասիլի Տարլևը կմասնակցի հոկտեմբերի 20-ին կայանալիք նախագահական ընտրություններին։

«Ես ընդունեցի մեր երկրում և արտերկրում ապրող հազարավոր քաղաքացիների կոչն ու առաջարկը՝ ակտիվորեն վերադառնալ քաղաքականություն», - ասել է Տարլևը ճեպազրույցում։

Նրա խոսքով, չնայած այն հանգամանքին, որ ինքը «Մոլդովայի ապագան» կուսակցության առաջնորդն է, ընտրություններին մասնակցելու է որպես անկախ թեկնածու։

«Ես մի կողմ եմ դնում կուսակցական շահերը և կոչ եմ անում մեր պետության բոլոր հայրենասերներին թողնել բոլոր ամբիցիաները և միավորվել», - ասել է Տարլևը, ով 2001-ից 2008 թվականներին զբաղեցրել է վարչապետի պաշտոնը և այժմ ղեկավարում է Մոլդովայի արդյունաբերողների և ձեռներեցների ազգային կոնգրեսը, ինչպես նաև Արդյունաբերողների և ձեռներեցների միջազգային կոնգրեսի խորհուրդը, որը միավորել է հանրապետության և բազմաթիվ երկրների գործարարներին։