Նիկոլ Փաշինյանը միայնակ չի կարող բռնապետություն հաստատել, եթե նրան չաջակցեն տարբեր պաշտոնյաներ, պատգամավորներ, իշխանության հաստիքային ու արտահաստիքային հաճախորդներ։
«Բռնապետության դեմքը» խորագրի այսօրվա «հերոսը» դատավոր Վահե Դոլմազյանն է, ով կատարում է Նիկոլ Փաշինյանի քաղաքական պատվերը՝ նրա ընդդիմախոսներին թողնելով անազատության մեջ:
Ազդեցիկ միջնորդություն, կամայական մերժում
Շուրջ մեկ տասնյակ քաղաքական գործիչների և պատգամավորների երաշխավորությունը չհամոզեց դատավոր Վահե Դոլմազյանին՝ ազատ արձակել ընդդիմադիր Հանրապետական կուսակցության փոխնախագահ Արմեն Աշոտյանին:
Դատավորը մերժեց տնային կալանքի, 40 միլիոն դրամ գրավի և երաշխավորության միջնորդությունները և Աշոտյանի կալանքը երկարաձգեց ևս երեք ամսով՝ մինչև ապրիլի 15-ը։
Նիկոլի կամքով
Հայաստանում առհասարակ անիմաստ է խոսել արդարադատության, դատական համակարգի անկախության մասին: Քաղաքական, հասարակական հնչեղություն ունեցող բոլոր գործերով դատավորներն առաջնորդվում են ոչ թե օրենքով, այլ Փաշինյանի կամքով, նրա խայտառակ հրահանգներով:
Արմեն Աշոտյան, Նարեկ Մալյան, Ալբերտ Բազեյան, Մամիկոն Ասլանյան. այս շարքը կարելի է համալրել բազմաթիվ անուններով:
Նրանք բոլորն անազատության մեջ են, որովհետև համարձակվել են Փաշինյանից տարբերվող դիրքորոշումներ ունենալ:
Վահրամ Բագրատյան