Եվրոպական խորհրդի նախագահ Շառլ Միշելը Վրաստանում տեղի ունեցած վերջին ընտրությունների մասին.
«Վրաստանում խորհրդարանական ընտրություններից հետո ես մտադիր եմ վրացական հարցը դնել Բուդապեշտում Եվրոպական խորհրդի ոչ պաշտոնական հանդիպման օրակարգում։
Մենք ի գիտություն ենք ընդունում ԵԱՀԿ-ի նախնական գնահատականը և կոչ ենք անում Կենտրոնական ընտրական հանձնաժողովին և այլ համապատասխան մարմիններին կատարել իրենց պարտականությունը՝ արագ, թափանցիկ և անկախ հետաքննելու և անդրադառնալու ընտրությունների հետ կապված բոլոր խախտումներն ու պնդումները:
Այս ենթադրյալ խախտումները պետք է հիմնովին պարզաբանվեն և շտկվեն։
Մենք ևս մեկ անգամ դիմում ենք Վրաստանի ղեկավարությանը` վերահաստատելու իրենց հավատարմությունը երկրի եվրոպական կուրսին` համաձայն հունիսի և հոկտեմբերին Եվրոպական խորհրդի նիստերի եզրակացությունների:
Այժմ հատկապես կարևոր է բոլոր քաղաքական ուժերի միջև կառուցողական և ներառական երկխոսությունը։
Նոյեմբերի իր նիստում Եվրոպական խորհուրդը կգնահատի ներկա իրավիճակը և կորոշի հետագա քայլերը Վրաստանի հետ մեր հարաբերություններում»:
Նշենք, որ ավելի վաղ, ԵԱՀԿ-ի, Եվրոպայի խորհրդի, Եվրախորհրդարանի և ՆԱՏՕ-ի միջազգային դիտորդների համատեղ առաքելութը հայտարարություն էր տարածել։
Նշելով, որ քվեարկության գործընթացը ընդհանուր առմամբ լավ կազմակերպված էր, դիտորդները միևնույն ժամանակ մատնանշեցին, որ ներկայիս «լարված իրավիճակը» և «անհավասար խաղադաշտը» խաթարում են ընտրությունների արդյունքների նկատմամբ վստահությունը։ Ի վերջո, ինչպես երևում է համատեղ հայտարարությունից, Վրաստանում ընտրական գործընթացը բավարար չափով չի համապատասխանել միջազգային ժողովրդավարական սկզբունքներին։
Եվրոպայում անվտանգության և համագործակցության կազմակերպությունը (ԵԱՀԿ) նույնպես դատապարտել է ձայների գնման, կրկնակի քվեարկության, ֆիզիկական բռնության և ահաբեկման դեպքերը:
Եվրախորհրդարանի պատվիրակության ղեկավար Անտոնիո Լոպես-Իսթուրիզ Ուայթը Թբիլիսիում կայացած մամուլի ասուլիսում նշել է, որ իշխող «Վրացական երազանք» կուսակցությունը թշնամական հռետորաբանություն է կիրառել ընտրություններին ընդառաջ, ինչպես նաև «նպաստել ռուսական ապատեղեկատվությանը»՝ փորձելով «խաթարել և շահարկել քվեարկությունը»:
Միևնույն ժամանակ, ԵԱՀԿ առաքելության ղեկավար Պասկալ Ալիզարը նշել է ընտրողների բարձր մասնակցությունը, ինչպես նաև դիտորդների մեծ թիվը տարբեր քաղաքական կուսակցություններից, ինչը, նրա կարծիքով, վկայում է ընտրողների աճի և զարգացման մասին։
Վրաստանի Կենտրոնական ընտրական հանձնաժողովի վերջին նախնական արդյունքների համաձայն՝ իշխող «Վրացական երազանք» կուսակցությունը վերջին խորհրդարանական ընտրություններում առաջատարն է՝ ստանալով ձայների 53,92%-ը։ 5 տոկոսի արգելքը հաղթահարել են չորս ընդդիմադիր ուժեր՝ «Փոփոխությունների կոալիցիան», որն ունի 11,04 տոկոս, «Միասնություն-Ազգային շարժում» կուսակցությունը (10,16%), «Հզոր Վրաստանը» (8,8%) և «Գախարիան հանուն Վրաստանի» (7,8%)։
Բացի այդ, Կենտրոնական ընտրական հանձնաժողովի նախնական տվյալներով, արտասահմանում բացված 67 ընտրատեղամասերում առաջատար է ընդդիմադիր «Հանուն Փոփոխությունների» կոալիցիան՝ 33,32% ձայն։ «Վրացական երազանքն» արտասահմանում միայն չորրորդ տեղում է (13,33%)։