Չնայած Նիկոլ Փաշինյանն առիթը բաց չի թողնում սահմանազատման վերաբերյալ ամեն անգամ հիշեցնել Կիրանցի օրինակը, Տավուշի մարզի սահմանամերձ գյուղում, մեղմ ասած, այդքան էլ գոհ չեն։

MediaHub-ը պարբերաբար կապ է հաստատում կիրանցեցիների հետ։ Վերջիններս դեմ չեն սահմանազատման-սահմանագծման գործընթացին, բայց ոչ այն տարբերակով, որը հապճեպ, առանց կանոնակարգի է տեղի ունեցել, և նկատի չեն առնվել անվտանգային հիմնահարցերը։

«Նախքան սահմանազատումը, ավելի ճիշտ՝ նախքան ադրբեջանցիներին «հյուրընկալելը», վերջին տարիներին միջինում կատարվել է 30-ից 40 հեկտար  աշնանացան ցորենի և գարու ցանք: Սահմանազատումից հետո պատկերը փոխվել է։ Այս պահի դրությամբ ունենք ընդամենը 2-ից 3 հեկտար վարված հող, իսկ աշնանացան ցորենի և գարու ոչ մի ցանքս»,- MediaHub-ին ասում է Կիրանցի բնակիչը՝ նշելով, որ տեղացիները վաճառել են անասունները: 

Նախկինում այստեղ բնակիչների հիմնական զբաղմունքը եղել է հողագործությունը և անասնապահությունը։ Սահմանազատումից հետո, ըստ տեղի բնակիչների, ո՛չ արոտավայր է մնացել, ո՛չ վարելահող։ Մինչդեռ հակառակն է ադրբեջանական կողմում։

«Հուլիսին մեր հողատարածքներում մեր արտերի հունձը կատարել են ադրբեջանցիները, հիմա էլ պատրաստվում են աշնանացանին։ Իրենց դաշտերը մշակված ու ցանված են: Հիմա, երբ խոսում են ամուր սահմանի, պարտադիր դելիմիտացիայի-դեմարկացիայի մասին, թող նշեն նաև դրա մասին։ Կիրանցում անգործություն է»,- հավելեց մեր զրուցակիցը։ 

Հունան Թադևոսյան