Հայաստանում ԵՄ նոր առաքելություն ուղարկելու հարցը պետք է համաձայնեցվի Բաքվի հետ: Այս մասին հայտարարել է Ադրբեջանի արտգործնախարար Ջեյհուն Բայրամովը տարեվերջյան ամփոփիչ մամուլի ասուլիսում։ Նա նշել է, որ ձևավորվում է նոր առաքելություն, Եվրամիության մասնագետները պլանավորում են կատարում, որպեսզի որոշեն, թե ինչով է զբաղվելու հերթական առաքելությունը և դրա շրջանակները։
«Ադրբեջանն առայժմ չի ստացել որևէ հաշվետվություն, որևէ փաստաթուղթ Հայաստանի և Ադրբեջանի չսահմանազատված սահմանին ԵՄ ավարտված առաքելության մասին»,- ասել է Բայրամովը:
Ինչ վերաբերում է նոր առաքելության էությանը, դրա աշխարհագրական ընդգրկվածությանը, ապա բոլոր հարցերը պետք է համաձայնեցվի Ադրբեջանի հետ:
«Չնայած նրան, որ այն ուղարկվելու է Հայաստանի տարածք, այդ հարցը վերաբերում է Ադրբեջանի շահերին»,- ասել է նա:
Բայրամովի խոսքով՝ ԵՄ-ում գիտեն Ադրբեջանի բացահայտ դիրքորոշումն այդ հարցի վերաբերյալ: «Պետք է լինի տեղեկության փոխանակում և համաձայնեցում մեզ հետ»,- ասել է նա: