Նախօրեին Ծաղկաձորում կվադրոցիկլի (քառանիվի) կողաշրջման հետևանքով վիրավորում ստացած երկու անչափահասների առողջական վիճակում դրական դինամիկա կա։ Այդ մասին MediaHub-ին հայտնում են Առողջապահության նախարարությունից։

Հիշեցնենք, որ վթարից հետո 4 քաղաքացի տարբեր աստիճանի մարմնական վնասվածքներով ծայրահեղ ծանր ախտորոշմամբ տեղափոխվել էին «Հրազդան» բժշկական կենտրոն, որտեղ վիրավորներից 2-ը, գիտակցության չգալով, մահացել էին։

Մյուս երկու քաղաքացիներից մեկը «Հրազդան» ԲԿ-ում բուժօգնություն ստանալուց հետո դուրս է գրվել, իսկ մյուսը հենց այդ օրը տեղափոխվել է Երևանի ԲԿ-ներից մեկը։

Այստեղ նրան վիրահատել են, և մինչ այս պահը նա հիվանդանոցում է։

«Նա դեռևս պետք է բուժզննում անցնի։ Այս պահի դրությամբ կյանքին վտանգ չի սպառնում»,- ասաց ԱՆ մամուլի խոսնակ Մարիամ Ծատրյանը։

Ավելի վաղ MediaHub-ին Քննչական կոմիտեից հայտնել էին, որ դեպքի առթիվ նախաձեռնվել է քրեական վարույթ՝ Քրեական օրենսգրքի 342-րդ հոդվածի 4-րդ մասի հատկանիշներով: 1 անձ ձերբակալվել է:

Նարե Գնունի