2022 թվականի հունվար-հունիս ամիսներին Հայաստանում արձանագրվել է կորոնավիրուսային հիվանդության 78 380 դեպք, որից 4596-ը՝ 0-18 տարեկանների շրջանում, ինչը կազմում է ընդհանուր թվի 5․9%-ը։ Նախորդ տարի նույն ժամանակահատվածում արձանագրվել է 35 480 դեպք, որից 2408 դեպքը 0-18 տարեկանների շրջանում՝ 6․8%: Այս մասին MediaHub.am-ի հարցմանն ի պատասխան հայտնել են Առողջապահության նախարարությունից։

Վերջին շրջանում Հայաստանում հատկապես շատ է խոսվում մանկահասակ երեխաների շրջանում կորոնավիրուսի վարակման թվի ավելացման մասին, ինչը նախկինում, կարծես, այդքան ցայտուն չի եղել: Փաստացի այս դիտարկումը ճիշտ է, ինչի մասին է վկայում նաև ԱՆ MediaHub-ի հարցման պատասխանը: Դրանից հետևում է, որ նախորդ տարի երեխաների շրջանում, այդ թվում մի քանի ամսական, կորոնավիրուսի տարածվածությունն այդքան բարձր չէր:

Նախարարությունից տեղեկացրել են, որ այս պահին մինչև 1 ամսական երեխաներն ուղեգրվում են «Մուրացան» հիվանդանոցային համալիր, 1 ամսականից մինչև 18 տարեկան երեխաները՝ «Արաբկիր» ԲՀԵԱԴԻ, «Ինֆեկցիոն հիվանդությունների ազգային կենտրոն»։

Նշենք նաև, որ մեզ փոխանցեցին՝ մինչև 18 տարեկան երեխաների հիվանդանոցում բուժման մեջ գտնվելու ընթացքում կորոնավիրուսային վարակի հաստատման դեպքում բուժումը շարունակվում է նույն բժշկական կազմակերպությունում՝ համապատասխան համաճարակային պայմանների ապահովմամբ։ 

«Մահճակալների թիվը փոփոխական է՝ ըստ երկրում տիրող համաճարակային վիճակի»։ 

ԱՆ-ի փոխանցմամբ՝ ՀՀ-ում, ինչպես և գրեթե ամբողջ աշխարհում, հիմնականում շրջանառվում են կորոնավիրուսային հիվանդության հարուցիչ Օմիկրոն տեսակի BA4 և BA5 տարբերակները։

«Վիրուսների նոր շտամների ի հայտ գալը պայմանավորված է վիրուսներին բնորոշ մուտացիոն փոփոխություններով»,- հայտնում են Առողջապահության նախարարությունից։

Լիաննա Թորոսյան