Ամերիկայի Միացյալ Նահանգների Օդագնացության և տիեզերական հետազոտությունների ազգային գործակալությունը (NASA) հոկտեմբերի 14-ից ոչ շուտ տիեզերանավ կուղարկի Յուպիտերի արբանյակ՝ Եվրոպա՝ պարզելու, թե արդյոք այնտեղ կյանքի համար պայմաններ կան:
«Europa Clipper» առաքելությունը նախատեսվում է սկսել Ֆլորիդայի Կանավերալ հրվանդանի Քենեդու տիեզերական կենտրոնից արձակման 39A համալիրից: Արձակման համար օգտագործվելու է ամերիկյան SpaceX ընկերության Falcon Heavy հրթիռը, հայտնել է NASA-ն։
Եվրոպան Յուպիտերի չորս ամենամեծ արբանյակներից մեկն է, որը հայտնաբերվել է Գալիլեո Գալիլեյի կողմից 17-րդ դարում։ Դրա մակերեսը ծածկված է սառույցով, որի տակ առկա է հեղուկ ջրից բաղկացած մի քանի կիլոմետրանոց օվկիանոս։ Այսօր մոլորակագետներն այն համարում են այլմոլորակային կյանքի հավանական կենտրոններից մեկը։ Դրան նպաստում է այն փաստը, որ ջրի այս մարմինը գազերն ու հանքանյութերը փոխանակում է մակերեսի սառույցի հետ, ինչպես նաև պարունակում է ջրածին և որոշ այլ նյութեր, որոնք կարող են աջակցել միկրոբների կյանքին:
Այդ իսկ պատճառով գիտնականներին վաղուց է հետաքրքրում, թե ինչպես է առաջացել Եվրոպայի ենթասառցադաշտային օվկիանոսը, և ինչ քիմիական բաղադրություն ունի: Առանձնահատուկ հետաքրքրություն է ներկայացնում այս այլմոլորակային ջրային մարմնի տարիքը, ինչպես նաև՝ արդյոք այն առաջացել է Յուպիտերի արբանյակի վրա՝ տեղական սառույցի և ժայռերի հանքավայրերից, թե՞ այն ստեղծվել է աստերոիդների և գիսաստղերի հետևանով, որոնք ընկել են Եվրոպայի մակերեսին հեռավոր անցյալում։
Տեսանյութն այստեղ