Չինացի է ձերբակալվել մամոնտի ժանիքների ավելի քան 3000 բեկորներ տեղափոխելու համար:
Դրանց արժեքը գերազանցել է 1 մլն ռուբլին։
Տղամարդը Մոսկվայի Շերեմետևոյից Գուանչժոու է պատրաստվել թռչել։
«Ուղեբեռի» քաշը կազմել է գրեթե 40 կգ, հաղորդում է ՌԴ Դաշնային մաքսային ծառայությունը։
35-ամյա օտարերկրացին տեսուչներին ասել է, որ ապրանքի արժեքը, իբր, չի գերազանցել 300 հազար ռուբլին։ Նա չի իմացել մաքսային կանոնները, և նախատեսել է ապրանքն օգտագործել հուշանվերներ պատրաստելու համար, հավելել է ծառայությունը։
ՌԴ մշակույթի նախարարության եզրակացության համաձայն՝ առգրավված գտածոն մշակութային արժեք է։ Հարուցվել է քրեական գործ։ Օտարերկրացուն սպառնում է մինչև 5 տարվա ազատազրկում և մինչև 1 մլն ռուբլի տուգանք։