Քաղցր լիմոնադը կարող է հրահրել քաղցկեղի և տարիքային հիվանդությունների զարգացում, Sputnik ռադիոյին տված հարցազրույցում զգուշացրել է սննդաբան, բժշկական գիտությունների դոկտոր, Սամարայի սննդաբանության և դիետիկ թերապիայի գիտահետազոտական ինստիտուտի տնօրեն Միխայիլ Գինզբուրգը։ Նրա խոսքով՝ ըմպելիքների բաղադրության մեջ պարունակվող շաքարն ավելի վնասակար է, քան պինդ մթերքներում։
«Լիմոնադն ունի բուրավետիչներ, ներկանյութեր և շատ շաքար։ Դա բացարձակ վնասակար մթերք է։ Հեղուկի շաքարը նույնիսկ ավելի վնասակար է, քան շաքարավազը այն կերակուրի բաղադրության մեջ, որը պետք է ծամել։ Հեղուկ շաքարը շատ արագ է ներծծվում օրգանիզմի կողմից և ինչ-որ պահի դրա կոնցենտրացիան արյան և հյուսվածքների մեջ կարող է կտրուկ աճել»,- պարզաբանել է սննդաբանը։
Իսկ դա, ըստ նրա, հղի է օրգանիզմի համար չափազանց անցանկալի հետևանքներով։
Լիմոնադի հաճախակի օգտագործումը կարող է հանգեցնել գիրության, շաքարախտի, հիպերտոնիայի և նույնիսկ քաղցկեղի՝ շարունակել է նա։
Ըստ նրա՝ շատ ավելի լավ է ծարավը հագեցնել ըմպելիքներով, որոնք շաքար չեն պարունակում։
«Լավագույն տարբերակը ջուրն է։ Եթե ցանկանում եք հաճույք ստանալ, ապա շատ լավ է ինքնուրույն լիմոնադներ պատրաստել՝ կիտրոնի, կոճապղպեղի և բնական քաղցրացուցիչների հավելումներով, բայց միայն առանց շաքարի։ Կարող եք օգտագործել մրգային ըմպելիքներ կամ բուսական ըմպելիքներ»,- Sputnik ռադիոյին տված հարցազրույցում խորհուրդ է տվել Միխայիլ Գինցբուրգը։