Լարսում կրկին կուտակումներ են, այս անգամ՝ դեպի Հայաստան անցակետեր հասնելու համար են վարորդներն օրերով սպասում։
«Տաս օր առաջ Հայաստանից եկել եմ, գնացել ՌԴ, ընդամենը երկու ժամ եմ սպասել ամբողջ ընթացքում, հիմա երեք օր միայն սպասում եմ, որ ռուս-վրացական սահմանն անցնեմ»,- MediaHub-ի հետ զրույցում ասաց բեռնատարի վարորդներից մեկը։
Նրա խոսքով՝ վրացական կողմը չի թողնում, որ հայկական մեքենաներն անցնեն, քանի որ անցակետն անցնելուց հետո ստիպված են լինելու օրերով կանգնել ճանապարհին, ինչը կխոչընդոտի մեքենաների՝ դեպի վրացական գյուղեր տեղաշարժը։
«Ասում են՝ մերոնք չեն աշխատում, վրացին էլ չի թողնում, որ անցնենք, որ կուտակումներ իր տարածքում չառաջանան»,- ասաց մեր զրուցակիցը։
Նշենք, որ վրացական մամուլն այսօր գրել էր՝ Վրաստանի Քվեմո Քարթլիի մարզի Մառնեուլի քաղաքից մինչև վրաց-հայկական «Սադախլո-Բագրատաշեն» սահմանային անցակետ տանող մոտ 36 կմ-անոց ճանապարհին երթևեկությունը խցանված է գրեթե մեկ շաբաթ: Ճանապարհին բեռնատարների կուտակումներ են, որոնց կիլոմետրանոց հերթերը առաջացրել են տեղաշարժի և երթևեկի հետ կապված խնդիրներ:
Նարե Գնունի