Մենք չենք կարող թույլ տալ այնպիսի երկրներին, ինչպիսին Չինաստանն է, օգտագործել իր դիրքը հումքի հիմնական տեսակների, տեխնոլոգիաների կամ ապրանքների շուկայում՝ մեր տնտեսությունը քայքայելու եւ աշխարհաքաղաքական անցանկալի լծակներ օգտագործելու համար։ Ֆինանսների նախարար Ջանեթ Յելենն այս մասին հայտարարել է Սեուլում՝ հարավկորեական տեխնոլոգիական հսկա LG Corp-ի օբյեկտներում շրջայցից հետո՝ Հնդկա-Խաղաղօվկիանոսյան տարածաշրջան կատարած իր 11-օրյա այցի վերջին փուլի ընթացքում, հայտնում է Reuters-ը։
Նրա խոսքով՝ ԱՄՆ-ը եւ նրա դաշնակիցները, ինչպիսին է Հարավային Կորեան, պետք է կենտրոնանան «ընկերներին աջակցելու» կամ իրենց մատակարարումների շղթաները դիվերսիֆիկացնելու վրա, որպեսզի ավելի շատ ապավինեն վստահելի առեւտրային գործընկերներին՝ ամրապնդելով տնտեսական ճկունությունը եւ նվազեցնելով ռիսկերը։
Նրա կարծիքով, դա կաջակցի տնտեսական ինտեգրման հետ կապված դինամիզմին եւ արտադրողականության աճին եւ կօգնի ԱՄՆ-ի ու Հարավային Կորեայի քաղաքացիներին մեկուսացնել աշխարհաքաղաքական ռիսկերի հետեւանքով առաջացած գների աճից:
Նա նշել է, որ համավարակը եւ Ուկրաինայում պատերազմը ցույց տվեցին մատակարարման շղթայի խոցելիությունը վերացնելու եւ գերբեռնվածությունն ու դեֆիցիտը նվազեցնելու աշխատանքի անհրաժեշտությունը, որոնք հանգեցրել են գների բարձրացման ամբողջ աշխարհում:
Նա Միացյալ Նահանգներին եւ նրա դաշնակիցներին առաջարկել է պահպանել կանոնների վրա հիմնված գլոբալ կարգի լավագույն հատկանիշները՝ միաժամանակ վերացնելով Չինաստանի «անբարեխիղճ» առեւտրային պրակտիկան եւ ապահովելով կենսական ռեսուրսների եւ ապրանքների հասանելիությունը՝ դեղերից մինչեւ կիսահաղորդիչներ եւ էլեկտրական մեքենաների մարտկոցներ:
Առեւտրի նոր մոտեցման բանալին երկրներից պահանջում է, որ նրանք պատշաճ կերպով հաշվի առնեն չափազանց կենտրոնացված մատակարարման շղթաները, աշխարհաքաղաքական խնդիրները եւ արժեքը, այլ ոչ թե «չափից շատ կենտրոնանան ծախսերի վրա»: