Հնդկաստանը կձգտի ավելի լայն կոնսենսուսի հասնել նախքան ռուսական նավթի գների սահմանափակմանն ուղղված ԱՄՆ-ի գլխավորած ջանքերին աջակցելը, ինչը, ինչպես սպասվում է, կպնդեն ԱՄՆ պաշտոնյաներն այս շաբաթ Մումբայ եւ Նյու Դելի իրենց այցերի ժամանակ։
Հնդկաստանը, որը ռուսական նավթի խոշորագույն գնորդներից մեկն է դարձել ուկրաինական հակամարտության բռնկումից ի վեր, վարանում է միանալ ծրագրին, քանի դեռ բոլոր գնորդների հետ կոնսենսուս ձեռք չի բերվել, հաղորդում է Bloomberg-ը՝ վկայակոչելով անանուն աղբյուրները։
Այդ ուղերձը, հավանաբար, ԱՄՆ ֆինանսների փոխնախարար Ուոլլի Ադեյեմոյին եւ նրա թիմին կփոխանցվի չորեքշաբթիից ուրբաթ Հնդկաստանի կառավարության պաշտոնյաների եւ կորպորատիվ ղեկավարների հետ հանդիպումների ժամանակ: Դրա ղեկավար Ջանեթ Յելենը եւ նախարարությունը գլխավորել են գների սահմանափակումների գաղափարում դաշնակիցներին ներգրավելու ջանքերը, որոնք, ըստ նրանց, Ռուսաստանին կզրկեն եկամուտներից՝ առանց նավթը շուկայից հանելու եւ գները բարձրացնելու:
Նավթի գնի սահմանաչափի արդյունավետությունը կարող է կախված լինել այնպիսի առանցքային գնորդների պարտավորությունից, ինչպիսիք են Չինաստանը եւ Հնդկաստանը, որոնք ավելացրել են նավթի գնումները Ռուսաստանից: Ռուսական նավթի գները սահմանափակող կոալիցիան ընդլայնվել է՝ ներառելով մի շարք երկրներ, չորեքշաբթի Մումբայում տեղի ունեցած միջոցառման ժամանակ ասել է Ադեյեմոն՝ հավելելով, որ «չի պատրաստվում առաջ ընկնել կոալիցիայի հայտարարություններից»:
Հնդիկ քաղաքական գործիչները մտավախություն ունեն, որ գնի սահմանափակման մասով պարտավորությունները կխաթարեն իրենց հասանելիությունը զեղչված ռուսական նավթին, նշում են աղբյուրները։ Աշխարհի երրորդ խոշոր գնորդը, որը ներկրում է իր նավթի կարիքների 85 տոկոսը, ապավինում է ռուսական ավելի էժան մատակարարումներին՝ մոտ 7 տոկոս գնաճը մեղմելու եւ առեւտրի ռեկորդային դեֆիցիտը զսպելու համար:
Ակնկալվում է, որ Ադեյեմոն նաեւ կխնդրի Հնդկաստանին խստացնել վերահսկողությունը եւ հետեւել, թե որտեղ է վաճառվում ռուսական նավթից պատրաստված արտադրանքը, ասել է աղբյուրներից մեկը:
Եվրամիությունը տարեվերջին հավանություն է տվել ռուսական նավթի ծովային ներկրման արգելքին եւ, Մեծ Բրիտանիայի հետ միասին, մտադիր է արգելել իր ընկերություններին ֆինանսավորել կամ ապահովագրել այդպիսի բեռնափոխադրումները։ ԱՄՆ պաշտոնական ներկայացուցիչները մտավախություն ունեն, որ այդ արգելքները կդադարեցնեն Ռուսաստանի արդյունահանման մեծ մասը եւ համաշխարհային գների աճի կհանգեցնեն՝ մինչեւ 140 դոլար մեկ բարելի դիմաց:
Brent նավթն օգոստոսի սկզբից ի վեր առաջին անգամ գերազանցել է 100 դոլարը բարելի դիմաց, թեեւ կտրվել է մարտին գրանցված 140 դոլար վերջին առավելագույնից։
Ադեյեմոն Հնդկաստանով իր շրջագայությունը սկսել էր Մումբայում, որտեղ չորեքշաբթի այցելել է Հնդկական տեխնոլոգիական ինստիտուտ եւ ստարտափների ինկուբատոր՝ Նորարարության եւ ձեռներեցության միություն։ Նախապատրաստված ելույթում նա ասել է, որ ամերիկացի սպառողներն ապավինում են Հնդկաստանում մշակված արտադրանքին եւ նորարարություններին։