Կառավարությունն այսօրվա նիստի ընթացքում չզեկուցվող հարցերի փաթեթով ընդունեց որոշման նախագիծ, ըստ որի՝ Զանգեզուրի պղնձամոլիբդենային կոմբինատի 21.8 տոկոս պետական սեփականություն հանդիսացող բաժնետոմսերի կառավարման լիազորությունները կվերապահվեն պետական գույքի կառավարման կոմիտեին ՏԿԵՆ-ին։
Որոշման նախագծի հիմնավորման մեջ նշված է, որ այս փոփոխությունն իրականացվում է Ընկերության կորպորատիվ կառավարմանն առավել ինստիտուցիոնալ մոտեցմամբ մասնակցելու անհրաժեշտությունից ելնելով։
«Բաժնետոմսերի կառավարման արդյունավետությունն ապահովելու նպատակով նախագծով նախատեսվում է Կոմիտեի կողմից Ընկերության բաժնետոմսերի կառավարման լիազորություններն իրացնելիս Կոմիտեի կողմից կայացվելիք որոշումները նախապես տեղեկացնել ՀՀ փոխվարչապետ Մհեր Գրիգորյանի գրասենյակ»,- ասված է հիմնավորման մեջ։
Նախագծով նախատեսվում է նաև, որ Ընկերության բաժնետոմսերի կառավարման գործընթացում Ընկերությունից ստացված ֆինանսական և այլ բնույթի հաշվետվությունները, Ընկերության բաժնետերերի ընդհանուր (արտահերթ) ժողովի արձանագրությունները և այլ փաստաթղթերը պետական գույքի կառավարման կոմիտեի կողմից դրանք ստանալուց 3 աշխատանքային օրվա ընթացքում ներկայացվում են ՀՀ փոխվարչապետ Մհեր Գրիգորյանի գրասենյակ:
Հիշեցնենք, որ 2021 թվականի հոկտեմբերի 1-ին հայտնի դարձավ, որ Հայաստանի կառավարությունը Զանգեզուրի պղնձամոլիբդենային կոմբինատի համասեփականատեր է դարձել՝ ստանալով բաժնետոմսերի 15%-ը։ Դրանից ամիսներ անց էլ Կառավարությունը որոշեց իր բաժնեմասը հանձնել «Հայաստանի պետական հետաքրքրությունների ֆոնդ» ընկերությանը, որը պետական սեփականություն հանդիսացող առևտրային կազմակերպություն է, որի տնօրենների խորհրդի նախագահը նախկին փոխվարչապետ, ներկայում Երևանի փոխքաղաքապետ Տիգրան Ավինյանն է, իսկ գործադիր տնօրենն է Դավիթ Փափազյանը, ով նախկինում աշխատել է բանկային ոլորտում։
Նարե Գնունի