ԱՄՆ նախագահ Դոնալդ Թրամփն իր Truth Social սոցիալական ցանցում հայտարարել է, որ ներում է շնորհել Darknet-ում Silk Road առցանց առևտրային հարթակի հիմնադիր Ռոս Ուլբրիխտին։
«Մետաքսի ճանապարհ»-ում անանուն կերպով վաճառվում էին անօրինական ապրանքներ, այդ թվում՝ թմրանյութեր, կեղծ փաստաթղթեր, զենք, հալիցունագեն սնկեր և այլն։ Ուլբրիխտը մի քանի տարի անցկացրել էր բանտում ու դատապարտվել ցմահ ազատազրկման։
Թրամփը գրել է, որ զանգահարել է Ուլբրիխտի մորը, որպեսզի պատմի նրան որդու ներման մասին «ի պատիվ նրա և ազատատենչ շարժման, որն այնքան ուժեղ է աջակցել [նրան]»։
Քաղաքական գործչի խոսքով՝ «Մետաքսի ճանապարհ»-ի հիմնադրի պատիժն անհամաչափ է հանցագործությանը։ Հանրապետականը Ուլբրիխտի դատավարությանը մասնակցածներին անվանել է «տականք»՝ կապված հենց Թրամփի դեմ քրեական գործերի հետ։
Նախընտրական քարոզարշավի ընթացքում Թրամփը խոստացել էր մեղմել Ուլբրիխտի պատիժը՝ փորձելով աջակցություն ստանալ ազատականների կողմից, ովքեր «Silk Road» հիմնադիրին հերոս են համարում, նշել է Axios-ը։
«Մետաքսի ճանապարհ»-ը գործարկվել է 2011 թվականին։ Իր գոյության գրեթե երեք տարվա ընթացքում կայքը դարձել է թմրանյութերի միջազգային շուկա՝ ավելի քան 1,5 միլիոն գործարքներով, ներառյալ հերոինի, կոկաինի և այլ անօրինական նյութերի վաճառքը, նշել է New York Times-ը: Ուլբրիխտը ձերբակալվել է 2013 թվականին և մեղադրվել թմրամիջոցների ապօրինի շրջանառության, փողերի լվացման և հանցավոր կազմակերպություն ստեղծելու համար։ Այդ ժամանակ նա 29 տարեկան էր։ Առնվազն վեց մարդ, ովքեր տեղում թմրանյութ են գնել, մահացել են չափից մեծ դոզայից, հայտնել էին դատախազները: 2015 թվականին Ուլբրիխտը դատապարտվել էր ցմահ ազատազրկման՝ առանց պայմանական վաղաժամկետ ազատման հնարավորության։