Ինչ միտում ունի ՀՅԴ անդամների բնակարանների խուզարկությունը․ սա քաղաքակա՞ն, թե՞ իրավական հետապնդում է։ «Հայաստան» խմբակցության քարտուղար Արծվիկ Մինասյանը վստահ է, որ սա ամիսներ առաջ սկսված քաղաքական հետապնդման հերթական փուլն է։
Պատգամավորը հիշեցնում է Դիմադրության շարժման ակտիվ շրջանի ժամանակ ապօրինի կերպով հարուցված մի քանի քրեական գործեր, որոնց շրջանակներում սկսել են մասայական խուզարկություններ անցկացնել Հայ Հեղափոխական Դաշնակցության բազմաթիվ անդամների թե՛ բնակարաններում, թե՛ կուսակցության գրասենյակներում։
«Ըստ էության, ինչի՞ վրա է հիմնված այս հանցագործ իշխանության վարքագիծը. իրականացնում են ապօրինի գաղտնալսումներ, անհասկանանելի է նաև, թե ո՞ւմ են գաղտնալսում, որովհետև, ի վերջո, ներկայացնում են մեղադրանք գաղտնալսման վերաբերյալ, բայց թե ինչի՞ մասին են խոսում, ի՞նչ թեմայով՝ կարևոր չի»,-ասաց Արծվիկ Մինասյանը։
Ըստ ընդդիմադիր պատգամավորի, ակնհայտ է, որ այս մարդիկ, ովքեր նման որոշումներ են կայացրել, ակնհայտորեն քաղաքական հետապնդման վարքագիծ են դրսևորել, որովհետև խոսքը քաղաքական ուժերի՝ ՀՅԴ-ի կոնկրետ պատասխանատուների մասով է։
«Օրինակ, այսօր առավոտյան ժամը 7։00-ին նաև Դաշնակցության գերագույն մարմնի նախագահ Սիմոն Սիմոնյանի տուն են այցելել խուզարկության և ժամը 15:00-ին էլ հրավիրել են որպես վկա հարցաքննության»,-նշեց Արծվիկ Մինասյանը։
Հիշեցնենք, որ ՀՅԴ ԳՄ ներկայացուցիչ Իշխան Սաղաթելյանը հայտնել էր, որ այսօր վաղ առավոտյան ուժային կառույցների ներկայացուցիչները Արարատի մարզում և Երևանում ներխուժել են ՀՅԴ մի շարք անդամների բնակարաններ խուզարկություն իրականացնելու պատրվակով. կան բերման ենթարկվածներ: