ԱԺ «Քաղաքացիական պայմանագիր» խմբակցության պատգամավոր Հայկ Սարգսյանի ներկայացած օրենքի նախագիծը, որ այդքան մեծ աղմուկ է բարձրացրել, այսօր ԱԺ պաշտպանության և անվտանգության հարցերի մշտական հանձնաժողովի արտահերթ նիստում չքննարկվեց։ Նիստը վարող Արմեն Խաչատրյանը հայտարարեց՝ քանի որ շատ են տարակարծությունները, նիստը չեղարկվում է։
Ինչո՞ւ է նախագիծը նման տարակարծություն առաջացրել, եթե արդեն Կառավարությունն էլ է հավանություն տվել օրենքի նախագծին, ՊՆ-ն էլ է արդարացված համարում այս նախագիծը․ MediaHub-ը փորձեց ճշտել հենց օրենքի հեղինակից։
«Չգիտեմ, թե ինչու է նման տարակարծություն առաջացել հանրության շրջանում, բայց ես օրենքի նախագիծը ներկայացնելիս հստակ հիմնավորել եմ, թե ինչու է անհրաժեշտ այն ընդունել»,- MediaHub-ի հետ զրույցում ասաց Հայկ Սարգսյանը։
Դիտարկմանը, որ մարդու իրավունքների նախկին և ներկա պաշտպանները ևս խնդրահարույց են համարում նախագիծը՝ նշելով, որ այն սոցիալական անհավասարությունն էլ ավելի կսրի, Սարգսյանն արձագանքեց՝ անհիմն են այդ հայտարարությունները։
Ըստ պատգամավորի՝ այսպես թե այնպես, մարդիկ, որոնք չեն ուզում, որ իրենց որդիները ծառայեն բանակում, ամեն ինչ անում են նրանց քաղաքացիությունը փոխելու համար, և հիմա ինքն ուղղակի առաջարկում է դա անելու համար այնքան գումար մուտք անել բյուջե, որ երկու պայմանագրային զինծառայող կարողանա ծառայել իրենց փոխարեն։
Հարցին, թե արդյո՞ք նախագծի քննարկումը ԱԺ աշնանային նստաշրջան կտեղափոխվի, Սարգսյանն արձագանքեց, որ ոչ։
«Հանձնաժողովի արտահերթ նիստ է լինելու, որից հետո էլ ԱԺ արտահերթ նիստ կգումարվի, ու նախագիծը կքննարկվի»,- նշեց Հայկ Սարգսյանը։
Նշենք, որ պատգամավորի առաջարկած նախագծի համաձայն՝ զորակոչի ենթակա տղաները կարող են քիչ ժամանակով ծառայել՝ փոխարենը գումար վճարել պետությանը։ Նրանք կարող են ընտրել հետևյալ երեք տարբերակներից որևէ մեկը՝ ծառայել 24 ամիս և ստանալ բարձր դրամական ապահովություն պետության կողմից, ծառայել 6 ամիս և պետբյուջե վճարել 15 միլիոն դրամ, ծառայել 1 ամիս և պետբյուջե վճարել 24 միլիոն դրամ։
Ինչ վերաբերում է չծառայելու նպատակով ՀՀ քաղաքացիությունից հրաժարվելուն, ապա ըստ պատգամավորի առաջարկի, օրենքով նախատեսված 25 000 դրամի փոխարեն կսահմանվի 15 մլն դրամ վճար։
Նարե Գնունի