Սպիտակի ավերիչ երկրաշաժից անցել է 34 տարի, բայց հազարավոր ընտանիքներ դեռևս ապրում են կիսաքանդ տնակային ավաններում՝ ծայրահեղ ծանր սոցիալական, կենցաղային պայմաններում։ Պաշտոնական տվյալներով միայն Գյումրու տնակային ավաններում ապրում են 2400 ընտանիքներ, իսկ վթարային շենքերի թիվը 30 է, որտեղ մարդիկ բնակվում են՝ չունենալով այլընտրանք։ «Շիրակ կենտրոն» ՀԿ-ի ղեկավար Վահան Թումասյանը MediaHub-ի հետ զրույցում նշում է, որ Գյումրիում այս հարցով վերջին ծրագիրն արվել է տասը տարի առաջ՝ «Մուշ 2» թաղամասի կառուցումն էր, որից հետո ոչ մի տեղաշարժ չի եղել։
«Վթարային շենքերը երկրաշարժից հետո պետք է ամրացնեին, բայց չեն ամրացրել։ Ունենք անհասկանալի 9 հարկերով մի թաղամաս՝ Ֆուտբոլային թաղամասը, որն առանց հարմարությունների է, ոչ մի վերելակ չի աշխատում»,- ասաց նա։
Վահան Թումասյանի խոսքով՝ վերջերս Գյումրիում կառուցվել է երկու շենք մոտավորապես 30 ընտանիքների համար՝ «Հայաստան» համահայկական հիմնադրամի, ԱՄՆ-ում հանգանակած գումարների հաշվին, բայց նշված շենքերը դեռ չեն շահագործվել։
«Թաղամասեր կան, որ առհասարակ ուշադրությունից դուրս են, որոնք հետերկրաշարժյան ժամանակահատվածում են ձևավորվել, թաղամասերում մշակութային կոմունալ կենցաղային պայմանները բացակայում են, էլ չխոսենք հիմնարկ-ձեռնարկությունների մասին»,-ընդգծեց մեր զրուցակիցը։
Վահան Թումասյանի խոսքով՝ ներկայումս դժվար է հովանավորներին բացատրել, որ 34 տարի անց էլ դեռևս Հայաստանում այս խնդիրը կա, գոյություն ունի «աղետի գոտի», որ մարդիկ բնակարանների կարիք ունեն, որ վատ պայմաններում են ապրում։
«Սովորաբար մարդիկ մոդայիկ խնդիրներն են ավելի շատ սիրում, արդեն ժամկետանց խնդիր են համարում երկրաշարժն ու դրա հետևանքները, որովհետև տարիների ընթացքում, երբ իշխանությունները չէին կարողանում խնդիրը լուծել, սկսում էին շահարկել ու վարկաբեկել, թե բոլորը տուն են ստացել և վաճառել են, կամ մեկ ընտանիքը մի քանի անգամ է տուն ստացել, բայց դրանք հեքիաթներ են»,- շեշտեց նա։
Մեր զրուցակիցը նշեց, որ իրենց ՀԿ-ն նախորդ տարիների ընթացքում 12 բնակարան է նվիրել, բայց երրորդ տարին է՝ ոչ մի բնակարան չեն կարողացել նվիրել իրենց շահառուներին. «Մենք նաև վախենում ենք իրական թվերը հնչեցնել, որովհետև երբ ասում ենք հաշվառված տնակների թիվը, կամ գործարանային հանրակացարանների թիվը, մոռանում ենք վթարային շենքերը, ապա ընդհանուր առմամբ կազմում է մոտավորապես 6 հազար ընտանիք»,-մտահոգություն է հայտնում Վահան Թումասյանը, հավելելով, որ երկրաշարժ լինելու դեպքում վթարային շենքերը քանդման ենթակա են։
Նշենք նաև, որ պաշտոնական տվյալներով՝ 1988 թվականի երկրաշարժին զոհ է դարձել 25 հազար մարդ, 140 հազար մարդ հաշմանդամություն է ձեռք բերել, ավելի քան 500 հազարը՝ զրկվել տնից։
Շուշանիկ Միսկարյան