Օրերս ուժի մեջ մտավ դեղերը էլեկտրոնային դեղատոմսով բաց թողնելու վերաբերյալ որոշումը։ 

Այս որոշումը մեծ դժգոհություն է առաջացրել ոչ միայն քաղաքացիների և փորձագետների մոտ, այլ նաև հենց բուժաշխատողների շրջանում։

MediaHub-ի զրուցակիցը, ով հասկանալի պատճառներով ցանկացավ անանուն մնալ, նշեց․ «Դուք տեսե՞լ եք՝ ինչ համակարգիչներով են աշխատում բժիշկները, հիմնականում 100 տարվա են, 20 րոպե միանում են, 20 րոպե անջատվում, նույնքան տևում է ամեն ծրագիր բացելը, մի դեղատոմսը, որ թղթի վրա գրվում էր մի քանի վայրկյանում, հիմա նույն դեղատոմսը գրելու վրա ծախսում ենք 10-15 րոպե. և՛ մենք ենք նյարդայնանում, և՛ պացիենտը։ Ինչպե՞ս կարող է դա բժշկին դուր գալ»։ 

Հարցին, թե այդ դեպքում ինչու բժիշկներն այդ մասին չեն բարձրաձայնում, մեր զրուցակիցը պատասխանեց․ «Ես արդեն նշեցի, թե ինչ պրոբլեմ կա, չի կարող բժշկին դուր գալ այն, որ մեկ վայրկյանի գործն անում է 15 րոպե չարչարվելով, պարզապես չի կարող։ Բոլորը հրահանգավորվել են այդ մասին չխոսել։ Մեկին խաթրով, մյուսին՝ վախեցնելով, բայց դեմ են բոլորը: Նորից եմ կրկնում՝ չի կարող մարդուն դուր գալ գործն անիմաստ բարդացնելը։ Այլ հարց է, որ հայտնվել ենք մի իրավիճակում, որ բոլորը հասկանում են՝ ամեն ինչ տակն ու վրա շուռ է եկել․ բուժքույրը դառնում է պատգամավոր, կարծում է, որ արդեն բժշկից լավ բժշկություն գիտի․ նախարարն իրավաբան է, վաղն էլ գաստրոէնտերոլոգին կամ էնդոկրինոլոգին կփոխարինեն մի ուրիշ իրավաբանով կամ բուժքույրով, կհամարեն, որ ոչ մի սարսափելի բան տեղի չի ունեցել»։

Ճշտող հարցին՝ ստացվում է, որ ճնշումներ կա՞ն, մեր զրուցակիցն արձագանքեց. «Կուզեք համարեք ճնշում, կուզեք համարեք տեռոր․ փաստը մնում է փաստ, դժգոհ են բոլորը, սակայն դժգոհություն արտահայտելը կարող է հանգեցնել նրան, որ մարդկանց բուժեն ոչ թե բժիշկները, այլ իրավաբանները»։