Սահմանված ժամկետում ներկայացել եմ Գլխավոր դատախազություն, ապօրինի հարստացման շրջանակներում վերլուծություն է արվել, նյութեր են տվել, որոնց պիտի ծանոթանամ, առարկություններս ներկայացնեմ, որն էլ բնականաբար պատրաստվում եմ անել։ Այս մասին այսօր MediaHub.am-ի հետ զրույցում ասաց Երևանի նախկին փոխքաղաքապետ Վահե Նիկոյանը։

Հիշեցնենք, որ ավելի վաղ azdarar.am կայքում հրապարակված ծանուցագրից պարզ էր դարձել, որ Երևանի նախկին փոխքաղաքապետ Վահե Նիկոյանն ու նրա կինը՝ Արմինե Գրիգորյանը, հրավիրվել են դատախազություն՝ ապօրինի ծագում ունեցող գույքի բռնագանձման գործով կատարված ուսումնասիրության շրջանակում։

«Եթե չեմ սխալվում, այս փուլը գաղտնի է, չեմ կարող կոնկրետ ասել, թե ինչ գույքի մասին է խոսքը։ Բայց, կարծում եմ, շատ սպասեցնել չի տա. ես իմ օրինական եկամուտները կներկայացնեմ, վերլուծությունը հին ժամանակներից է՝ դեռ 90-ականներից։ Վարույթի փուլն ավարտվի, ամեն ինչ պարզ կլինի, ոչ ոքի համար գաղտնիք չի մնա»,-ասաց նա։

Նշենք նաև, որ վերջին շրջանում Գլխավոր դատախազությունը հաճախ է դատարան ուղարկում ապօրինի ծագում ունեցող գույքի բռնագանձման մասով նախկին պաշտոնատար անձանց գործերը։ Սակայն դեռ որևէ նիստ չի կայացել։

Հիշեցնենք , որ Վահե Նիկոյանը Երևանի փոխքաղաքապետի պաշտոնը զբաղեցրել է Տարոն Մարգարյանի օրոք:

 Լիաննա Թորոսյան