ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Ադրբեջանի կողմից իրեն 44֊օրյա պատերազմում "հաղթանակի" խորհրդանիշ բրոշ նվիրելը, ինչը մեծ աղմուկ էր բսրձրացրել։
Նա, մասնավորապես, հորդորել է չքաղաքականացնել Ադրբեջանի պատվիրակության կողմից իրեն տրված նվերը։
Սոչիում ընթացող Համաշխարհային երիտասարդական փառատոնի շրջանակներում ադրբեջանական պատվիրակության անդամը ՌԴ ԱԳՆ պաշտոնական ներկայացուցիչ Մարիա Զախարովային նվիրել է ծաղկի տեսքով բրոշ՝ «Ադրբեջանի հաղթանակի խորհրդանիշը»։
«Սա ևս մեկ աղմուկ հանած պատմություն է», - ասել է Զախարովան չորեքշաբթի օրը կայացած ճեպազրույցում:
Ինչպես նշել է դիվանագետը, նա բազմաթիվ նվերներ է ստացել տարբեր պատվիրակություններից. պաղեստինցիներն իրենց նվերներն են բերել «Պաղեստին» մակագրությամբ, արգենտինացիները նվիրել են իրենց կրծքանշանները, Չինաստանի ներկայացուցիչները՝ իրենց խորհրդանիշները՝ պանդաներով, Եկատերինբուրգի տղաները՝ սիրտ իրենց տարածաշրջանի զինանշանով։
«Սա չի նշանակում, որ ամեն ինչ պետք է քաղաքականացնել, ես կիսվում եմ ինչ-որ բաներով, ինչ-որ բաների մասին առաջին անգամ եմ սովորում, որոշ բաների հետ կարող եմ չհամաձայնվել: Մարդիկ խոսում են այն մասին, ինչն իրենց անհանգստացնում է: Սա բացարձակ նորմալ պատմություն է, երբ մարդիկ գալիս են և իրենց համար կարևոր է սիմվոլներ տալ և դրանց միջոցով պատմել իրենց պատմություններից մի քանիսը»,- ասել է Զախարովան։
Նա նշել է, որ դեռ չի դիտարկել բոլոր նվերները և հորդորեց մարդկանց չտրվել սադրանքներին։
Տեսանյութը՝ այստեղ