Երդվյալ ատենակալները Ալթայի երկրամասի մի բնակչի մեղավոր են ճանաչել իր ուսուցչի սպանության մեջ, հայտնում է Ռուսաստանի Դաշնության տարածաշրջանային Քննչական կոմիտեն․ գրում է Shantnews.am-ը։

Ինչպես նշվում է հաղորդագրության մեջ, «… ապացույցները բավարար են համարվել Նովոալտայսկ քաղաքի 23-ամյա բնակչին դատապարտելու համար»՝ ծանրացուցիչ հանգամանքներով գողություն կատարելու և առանձնակի դաժանությամբ սպանություն կատարելու համար՝ զուգորդված կողոպուտով։

Հետաքննությունը և երդվյալ ատենակալները պարզել են, որ 2021 թվականի ամռանը Նովոալտայսկում մի երիտասարդ որոշել է ավազակային հարձակում կատարել ֆինանսական դժվարությունների պատճառով։

«Տղամարդը հաստատ գիտեր, որ իր նախկին 65-ամյա ուսուցիչը միայնակ է ապրում, և մտնելով կնոջ տուն՝ առանձնակի դաժանությամբ վերջինիս մարմնին հասցրել է առնվազն 44 դանակի հարված, վնասվածքներից տուժածը տեղում մահացել է։ Տանը արժեքավոր ոչինչ չգտնելով՝ նա իր հետ տարել է ուսուցչուհուն պատկանող մոտ 15 հազար ռուբլու գույք, որից հետո անհետացել է»,- պարզաբանում են վարչությունից։

Երկար ժամանակ հանցագործությունը մնում էր չբացահայտված։

«Չնայած ամբաստանյալի դիրքորոշմանը, որ ինքը չի սպանել ուսուցչին, հանցագործության կատարման պահին գտնվել է իր ծնողների տանը, ինչպես նաև իր ալիբին պնդած հարազատների ցուցմունքներին, երդվյալ ատենակալները նրան մեղավոր են ճանաչել»,- տեղեկացնում է մարզային դատախազությունը։

Նշվում է, որ հետագա նիստում դատավճիռը կքննարկվի, կուսումնասիրվեն ամբաստանյալի գործողությունների որակավորման, ինչպես նաև պատիժ նշանակելու, քաղաքացիական հայցի լուծման վրա ազդող հանգամանքները։ Դրանից հետո դատարանը կհրապարակի վճիռը։