Այսօր Հայաստանի տասնյակ հազարավոր երեխաներ զրկված են մանկապարտեզներում, նախակրթարաններում ու դպրոցներում որակյալ կրթություն ստանալու հնարավորությունից։ Այսպես սկսեց վարչապետ Նիկոլ Փաշինյանն իր սեպտեմբերմեկյան շնորհավորանքը Կառավարության հերթական նիստի մեկնարկին։

Անդրադառնալով գիտելիքի օրվան՝ նա նշեց, որ կառավարությունն արդեն հաստատել է մինչև 2030 թվական կրթության զարգացման ծրագիրը, և դա միտված է հասանելի կրթություն ապահովելուն։
«Բուհերում միշտ չէ, որ ուսանողները ստանում են պատշաճ մասնագիտական կրթություն, և դա է պատճառը, որ մենք, մի կողմից, ունենում ենք գործազրկություն, մյուս կողմից՝ գնալով ավելի ու ավելի են շատանում երկրում որակյալ աշխատուժի բացակայության մասին պնդումները։ Մեր երկրում չեն գործում բուհական պատշաճ չափանիշներ, բազմաթիվ բուհեր պարզապես հոգեվարքի մեջ են, դիպլոմն էլ միշտ չէ, որ նշանակում է բարձրագույն կրթություն»,- ասաց Փաշինյանը։

Նրա խոսքով՝ այս վիճակն այլևս հանդուրժելի չէ, քանի որ այն ական է մեր ապագայի տակ.
«Ըստ այդմ, մենք կրթության ոլորտում բարեփոխումներ ենք իրականացնում։ Արդեն մեկնարկել է մինչև 2026 թվականը Հայաստանում 300 դպրոց և 500 մանկապարտեզ նորոգելու, կառուցելու և վերակառուցելու մեր ծրագիրը։ Այս ծրագրի իրականացման համար գյուղական բնակավայրերում էլ երեխաներն արդեն հնարավորություն կունենան պատշաճ կրթություն ստանալու։ Իմ կարծիքով, գյուղերը դատարկվում են նաև կրթական հաստատությունների անմխիթար լինելու պատճառով»,- նշեց Փաշինյանը։

Նա նաև տեղեկացրեց, որ Հայաստանում կառուցվելու են միջգյուղական կրթական հաստատություններ, որպեսզի փոքրաթիվ բնակչություն ունեցող մի քանի գյուղերի երեխաները հնարավորություն ունենան նույն դպրոցում սովորելու։ Փաշինյանը վստահեցրեց, որ նոր շենքեր են կառուցվելու և երեխաների ապահով տեղափոխություն է ապահովվելու։

Հիշեցնենք, որ ՀՀ վարչապես Նիկոլ Փաշինյանը չունի դիպլոմ։

Մանրամասները՝ տեսանյութում․