Եվրամիությունը կխրախուսի անդամ երկրներին կրճատել գազի պահանջարկը՝ ճյուղերին հորդորելով ավելի քիչ գազ օգտագործել, որպեսզի պատրաստվեն Ռուսաստանից մատակարարումների հնարավոր կրճատումներին, տեղեկացրել է Reuters-ը։
Բրյուսելը պատրաստվում է ռուսական գազի հետագա հնարավոր կրճատումներին, ինչը, ինչպես նախազգուշացրել է Արժույթի միջազգային հիմնադրամի ղեկավարը, կարող է տնտեսությունը ռեցեսիայի մատնել։
Եվրոպական հանձնաժողովի պլանը, որը պետք է հրապարակվի հուլիսի 20-ին, առաջարկում է երկրներին արդյունաբերության համար գազի օգտագործումը կրճատելու ֆինանսական խթաններ մտցնել, ինչպես նաեւ տեղեկատվական քարոզղություն վարել, որպեսզի սպառողներն ավելի քիչ քանակությամբ գազ օգտագործեն։
Արդյունաբերությանն ուղղված միջոցները կարող են ներառել աճուրդներ կամ տենդերներ՝ խթանելու համար խոշոր սպառողներին, որպեսզի ավելի քիչ գազ օգտագործեն, նշվել է նախագծում։
ԵՄ-ը ձգտում է ապահովել որքան հնարավոր է շատ գազի պահեստավորումը նաեւ ձմռան համար, երբ գազի պահանջարկը տների ջեռուցման համար հասնում է գագաթնակետին։
Տնային տնտեսությունները «պաշտպանված սպառողներ» են համարվում ԵՄ-ի օրենսդրությամբ, իսկ դա նշանակում է, որ գազի նորմավորումը վերջին հերթին է վերաբերելու նրանց։
«ԵՄ-ի մակարդակով ավելի վաղ ձեռնարկված համատեղ գործողություններն այս կրիտիկական պահին ավելի կնվազեցնեն պահանջմունքը ձմռանը, եթե հոսքերը Ռուսաստանից դադարեն»,- նշվել է նախագծում։
ԵՄ-ի գազի պահեստարանները ներկայում լցված են 62 տոկոսով, ինչը հեռու է նոյեմբերին դրանք 80 տոկոսով լցնելու նպատակից։